Jetim kórsek, jeń túrip járdem jasaıtyn, muqtajdardyń muńyna ortaqtasyp qoldan kelgenshe qoldaý kórsetetin qazaqy qasıet qanymyzda bar. Osy qasıetimizdi taǵy da baıqatatyn sát týyp tur. Sebebi, elimizde 7-29 qyrkúıek aralyǵynda «Shyn júrekten» qaıyrymdylyq telemarafony ótedi. Osyǵan baılanysty keshe Ortalyq kommýnıkasııalar qyzmetinde baspasóz máslıhaty boldy.
«2016 jyldyń sáýir aıynda «Qazaqstan» RTRK» AQ Qazaqstan halqy Assambleıasymen birlesip, «Shyn júrekten» keń aýqymdy qaıyrymdylyq telemarafonyn ótkizdi. Ol muqtaj jandarǵa tegin kómek kórsetýdi kózdedi. Joba aıasynda aýyr naýqasqa ushyraǵan jáne taǵdyr taýqymetin tartqan qazaqstandyqtarǵa kómek qarjysy jınaldy. Marafon qorytyndysy boıynsha 41 mıllıon teńgege jýyq qarajat tartyldy. Barlyǵy myńnan astam ótinish kelip tústi. Biz bul jobany jalǵastyrǵymyz keledi. Sondyqtan 7-29 qyrkúıekte Qazaqstan halqy Assambleıasymen birlesip, qaıyrymdylyq telemarafonyn ótkizemiz», – dedi «Qazaqstan» RTRK» AQ basqarma tóraıymy Nurjan Muhamedjanova.
Qazaqstan halqy Assambleıasynyń HHII sessııasynda Memleket basshysy Assambleıaǵa múddeli organdarmen birlesip, eldegi barlyq qaıyrymdylyq aksııalaryn QHA qamqorlyǵy aıasynda júrgizý máselesin pysyqtaý týraly tapsyrma bergen edi. Qazaqstan Respýblıkasynyń 2015 jylǵy 16 qarashadaǵy №402-V QRZ «Qaıyrymdylyq týraly» Zańyna sáıkes Assambleıa eldegi qaıyrymdylyqty damytý, osy saladaǵy úılestirý men basqa da demeý berý sharalaryna yqylasty ekenine Assambleıa Tóraǵasynyń orynbasary Eraly Toǵjanov toqtalyp ótti.
Qazaqstandyqtar úshin «Shyn júrekten» jobasynyń mańyzdylyǵy men qajettiligi óte joǵary, áli kúnge deıin uıymdastyrýshylarǵa elimizdiń azamattary tarapynan kóptegen ómirsheń máselelerdi sheshý boıynsha ótinishter kelip túsýde. Búgingi tańda 1200-den astam ótinish kelip túskendikten, «Qazaqstan» RTRK» AQ turaqty túrde toqsan saıyn osy jobany ótkizý týraly sheshim qabyldady.
Sharapatty shara kólemge emes, kóńilge, aqshaǵa emes nıetke baılanysty atqarylatyn amal ekenin umytpaǵanymyz abzal. Sondyqtan da, barymyzben bólisip, qoldan kelgenshe qoldaý kórsetýge tyrysaıyq. Bastysy, shyn júrekten jasaý kerek ekenin jadymyzdan shyǵarmaıyq.
Raýan QAIDAR,
«Egemen Qazaqstan»