Olımpıada jeńimpazdaryna beriletin syıaqy dollarmen emes, teńgemen ólshený kerek edi. Búgin Aqordada ótip jatqan QR Úkimetiniń keńeıtilgen otyrysynda aqsha-kredıttik saıasat jóninde baıandaǵan QR Ulttyq bankiniń tóraǵasy Danııar Aqyshev sanany dollarsyzdandyrýǵa qatysty osylaı renish bildirdi dep habarlaıdy Qazaqparat.
«Teńge baǵamynyń erkin «júzý» jaǵdaıynda aıyrbas baǵanymynyń kúsheıýi de álsireýi de bolyp turady. Bul negizinen syrtqy faktorlarǵa baılanysty. Degenmen, dollarsyzdandyrýǵa qatysty sharalar júıeli júrgizilýde. Teńgelik depozıtter halyq úshin basqa sheteldik valıýtaǵa qaraǵanda jeti esege deıin tıimdi», dedi Bas bankır. Onyń aıtýynsha, jyl basynan beri elimizde dollarsyzdandyrý úderisi anyq baıqalyp otyr. Máselen, teńge boıynsha depozıtter elý paıyzǵa deıin artsa, kerisinshe sheteldik valıýtadaǵy depozıtter tórt paıyzǵa kemigen.
«Solaı bola tura, qoǵam men bıznestiń teńge baǵamynyń erkin aınalymyna beıimdelýine de biraz ýaqyt kerek. Aktıvterdiń dollarlanýy ǵana emes, sananyń dollarlanýynan qutylý da ońaı emes. Teńgemen baǵamdaý, ulttyq valıýtamen ólsheýge kelgende qınalyp jatatyndar bar. Bul rette Ulttyq bank aktıvterdi dollarsyzdandyrýǵa qatysty júıeli sharalardy atqaryp keledi», - dedi D. Aqyshev.
Máselen, sanany dollarsyzdandyrý boıynsha ınternet saıttarda kólikter baǵasyn, jyljymaıtyn jáne basqa da múlikterdi teńgeden basqa kez kelgen valıýtada kórsetýge tyıym salynǵan. «Taýarlar men qyzmetterdiń baǵasyn kórsetýde, jarnamalaýda teńgeni ǵana kórsetý, basqa sheteldik valıýtalardy kórsetýge tyıym salý sharalaryn zańnamalyq yntalandyrý jumystaryn jalǵastyramyz. Árıne, ulttyq valıýtamen ólsheýge kelmeıtin jaǵdaılardy aıtyp otyrǵanymyz joq. Bul rette sanany dollarsyzdandyrýǵa qatysty aıta keteıin, Olımpıada chempıondaryna syıaqyny kórsetkende olarǵa beriletin somanyń mólsherin sheteldik valıýtada emes, teńgemen aıtýǵa da bolatyn edi», dedi UB basshysy