Aqıqatyn aıtqanda, bul kúnde Almatyda bir emes, birneshe Juldyzdar alleıasy bar. Onyń alǵashqysy «Qazaqfılm» ulttyq kınostýdııasynda bolsa, odan keıin «Almaty» shıpajaıynda da ashylǵan. Alaıda halyqqa eńbegi sińgen jandardy qurmetteý qashan da artyq emes. Endigi bir juldyzdar alleıasy almatylyqtar kóptep jınalatyn MEGAPark saıda oıyn-saýyq ortalyǵynyń kireberisinde ornalasqan.
Aıtqandaı, bul jerde alǵashqy bolyp eki dúrkin Olımpıada chempıony Ilıa Ilınniń juldyzy oıyp turyp oryn alǵan bolatyn. Kelesi bolyp óz juldyzyn «DOM» qorynyń jetekshisi Arýjan Saın jaqty. Juldyzdar shoǵyry munan keıin Olımpıada chempıony Aleksandr Vınokýrovpen tolyqty.
Al juma kúni áıgili qazaq akteri Asanáli Áshimovtiń juldyzy jarqyrady. MEGA-ny dýmandatqan oqıǵada búkil ǵumyryn ónerge arnaǵan akter Asanáli Áshimov: «Búgin men úshin tarıhı jáne qýanyshty kún, halqymnyń maǵan degen qurmeti. Bul Juldyz – meniń ustazdarymnyń, qurbylarymnyń, shákirtterimniń eńbegi. Igi bastama jalǵasyn tabý qajet. Osyndaı sharalardyń arqasynda óskeleń urpaq tatýlyqtan tárbıe alady, jańalyqqa qushtar bolyp ósedi, uly tulǵalarmen qaýyshady. О́ner men sport adamdardyń basyn qosady. О́z stýdentterime únemi: «Jumys pen eńbegin baǵalaǵan adam, qurmet pen ataqqa ıe bolady dep aıtyp otyramyn. Adam ataq pen dańkty izdemeý kerek, ataq adamdy ózi taýyp keledi». Halqyma, ónerime qyzmet etemin!» dedi.
Qazaqstannyń halyq artısin quttyqtaýǵa áriptesterimen birge «Qazaqfılm» kınostýdııasynyń prezıdenti Baqyt Qaıyrbekov, M.Áýezov atyndaǵy Qazaq memlekettik akademııalyq drama teatrynyń dırektory Erlan Bilál, Qazaqstannyń halyq ártisi Altynbek Qorazbaev, T.Júrgenov atyndaǵy Ulttyq О́ner akademııasynyń stýdentteri keldi. Qyzyqty sharaǵa saýda ortalyǵynda júrgen almatylyqtar da qosyldy.
«Búgingi tańda tulǵaly akter M.Áýezov atyndaǵy Qazaq memlekettik akademııalyq drama teatrynda spektaklder qoıyp, kınojobalarmen jumys isteýde. «Elim-aı» kınostýdııasyna basshylyq etedi. Rólderge, rejıssýraǵa, teatrǵa ózindik tásilmen qaraıdy, ony kórip, tamashalaý kerek, men úshin bul adam – minsiz. Halyq Asanáli aǵany syılaıdy, qoldaıdy jáne eńbegin joǵary baǵalaıdy», dedi Áýezov teatrynyń dırektory Erlan Bilál.
Aıtýly shara akter taǵdyry týraly «Aınadaı ister sheberi» atty derekti fılmmen aıaqtaldy. Fılm Asanáli Áshimovtiń 75 jyldyǵyna oraı túsirilgen. Atalmysh derekti lentanyń kórsetilimi Almatyda alǵash ret ótkizilip otyr.
Aınash ESALI, Almaty
Sýretterdi túsirgen avtor.