Qazaqstan TMD sheńberinde Belarýstiń negizgi saýda seriktesteriniń úshtigine kiredi. Statıstıkalyq málimetter boıynsha, Qazaqstan men Belarýs arasyndaǵy taýar aınalymy 2015 jyly 519,7 mln dollardy quraǵan, bul kórsetkish 2014 jylmen salystyrǵanda 37,8%-ǵa tómen. Sondaı-aq, Qazaqstannan Belarýske shyǵarylatyn eksport mólsheri 22,2%-ǵa qysqaryp, 47,7 mln dollar bolǵan. Belarýsten elmizge keletin ımport ta 39,0%-ǵa kemip, 472,0 mln dollardy qurapty. Mundaı úderistiń qalyptasýyn sarapshylar eń aldymen, qazirgi álemdik ekonomıkalyq daǵdarys jaǵdaıymen baılanystyryp otyr.
«Ekijaqty taýar aınalymnyń 90%-y Belarýs taýarlary men ónimderin qurasa, qalǵan 10%-y otandyq taýarlarǵa tıesili. Búgingi kúnge deıin eki eldiń arasyndaǵy taýar aınalymy birtindep ósip, shamamen 1 mlrd dollarǵa jaqyndap qalǵan edi. Alaıda, qarjylyq daǵdarystyń áserinen bul kórsetkish ótken jyly 519 mln dollarǵa deıin tómendedi. Bıylǵy jyly bul úderis áli de jalǵasyp keledi. Máselen, aǵymdaǵy jyldyń alǵashqy jartyjyldyǵynda taýar aınalymy 145,8 mln dollardy qurady. Bul ótken jylǵy dál osy ýaqyt aralyǵyndaǵy kórsetkishten 46,4%-ǵa tómen. Árıne, bul jaǵdaı eki elge ǵana baılanysty bolyp turǵan joq. Bul álemdegi ekonomıkalyq jaǵdaıdyń áserinen qalyptasqan úrdis. Biraq soǵan qaramastan, biz eksport-ımport, taýar aınalymy kórsetkishterin joǵarylatýǵa kúsh salatyn bolamyz». Syrtqy ister mınıstrligi arnaıy uıymdastyrǵan brıfıngte Qazaqstannyń Belarýs Respýblıkasyndaǵy Tótenshe jáne ókiletti elshisi Erǵalı Bólegenov osylaı dedi.
Tótenshe jáne ókiletti elshi sondaı-aq ekijaqty áriptestikke, qos memleket arasyndaǵy yntymaqtastyqtyń nyǵaıýyna memleket basshylarynyń senimge qurylǵan, dostyqqa negizdelgen qarym-qatynasy aıtarlyqtaı áser etkenin jetkizdi. Ol ǵarysh, aýyl sharýashylyǵy, ónerkásip, bilim-ǵylym, densaýlyq saqtaý, kommýnıkasııa, tranzıt, IT-tehnologııa, jol-qurylys, mashına jasaý salalarynda oń áriptestik baılanys ornatylǵanyna toqtalyp ótti. Máselen, Belarýstiń 5 áskerı akademııasy men joǵary oqý ornyn 2012 jyldan beri Qazaqstannan barǵan 300-ge tarta áskerı azamat támamdapty. Al búginde bul elde 300-den astam qazaqstandyq stýdent bilim alyp jatyr eken.
Láıla EDILQYZY