Memlekettik qyzmetshiler tún ortasyna deıin keńsede otyrmaýy tıis

Astanadaǵy Memlekettik qyzmet salasyndaǵy О́ńirlik hab pen BUU damý baǵdarlamasynyń Sıngapýrdaǵy Memlekettik qyzmetti jetildirý jahandyq ortalyǵy «Memlekettik qyzmet damýyndaǵy jahandyq jáne aımaqtyq trendter» atty keń kólemdi zertteýdi aıaqtady. Osyǵan baılanysty keshe habtyń basqarýshy komıtetiniń tóraǵasy Álıhan Baımenov pen Jahandyq ortalyq dırektory Maks Everest-Fıllıps Ortalyq kommýnıkasııalar qyzmetinde zertteýdiń tusaýkeserine qatysty baspasóz máslıhatyn ótkizdi. Sharany uıymdas­tyrý­shy­lardyń aıtýynsha, Eýropa, Sol­tústik Amerıka, Ońtústik-Shyǵys Azııa, Kavkaz, TMD elderi memle­ket­tik qyzmetiniń damýy men refor­ma­lanýynyń sońǵy jıyrma jyldaǵy negizgi úrdisteri osy eńbekte kóri­nis tapqan. Álıhan Baımenov óz só­zinde memlekettik qyzmet da­mýy­nyń birqatar jahandyq jáne óńir­lik sıpattaǵy úrdisterin atap ótti. Birinshi – memlekettik qyz­met­­shilerdi irikteý, qyzmet babynda joǵa­ry­latý júıelerinde model­der­diń bir-birine ózara áser etýi baıqa­lady. Bul memlekettik qyzmette taza mansaptyq nemese pozı­sııalyq model is júzinde qal­maǵanyn kórsetedi. Árqaısysynyń eń ozyq jaqtaryn qoldaný arqyly osy modelder boıynsha konvergensııa úderisi ótýde. Bul memlekettik basqarýdyń doktrınalyq negiz­derine de tán, dedi ol. Onyń habardar etýinshe, mem­lekettik qyzmet tıimdiligi adam re­sýrstarynyń sapasyna baılanys­ty ekendigi barshaǵa málim bolǵan­dyqtan, adam resýrstaryn basqarý sapasyna erekshe nazar aýdarylýda. Nátıjesinde irikteý men qyzmet babynda joǵarylatýda ashyqtyq pen tazalyqqa, memlekettik qyzmettegi etıka men adaldyqqa aıryqsha nazar salý umtylysy baıqalady. Úshinshi – memlekettik qyzmetkerler men memlekettik organdar jumysyn baǵalaýda úderister pen rásimderge ekpin salýdan góri nátıjelilik pen maqsatty ındıkatorlarǵa qol jet­kizýge basa nazar aýdarylýda. Bul memlekettik organdarda mened­­j­ment sapasyn jaqsartý, joba menedj­mentin engizý, jumys tıim­dili­gin baǵalaý júıesin jetildirý ar­qyly kórinis tabýda, dedi Á.Baı­menov. Al Maks Everest-Fıllıps sho­lýǵa silteme jasaı otyryp, mem­lekettik basqarý salasyndaǵy óz­gerister barlyq derlik elderde birtindep oryn alyp otyrǵanyn atap ótti. Munyń sebebi, úsh ba­ǵyt­taǵy ózgeristerge baılanys­ty: bi­rinshi – reformalardyń tujy­rym­da­malyq ıdeıalary, ekinshi – qarjy daǵdarysy, bilimdi halyq sanynyń artýy, jahandanýdyń joǵary qarqyny men jańa aqpa­rat­tyq tehnologııalarǵa baılanysty ósip kele jatqan qoǵamdyq qajet­tilikter. Úshinshi – jańa tásilder arqyly adam resýrstaryn basqarý salasyndaǵy tájirıbeler, onyń ishinde memlekettik qyzmetshilerdi monetarlyq emes jolmen yntalandyrý, dedi M.E-Fıllıps. Tusaýkeserde sóz alǵandar bul zertteý Qazaqstannyń, habtyń qatysýshy elderi jáne odan tysqary elderde memlekettik qyzmetti reformalaýmen aınalysatyndar osy saladaǵy ǵalymdar men sarapshylar úshin paıdaly ári biregeı derekkóz dep esepteıdi. Naqtyraq aıtqanda, bul jumys reformalardyń áleýe­tin arttyrýda aımaqtaǵy memleket­ter úkimetteriniń talpynystaryn qoldaı otyryp, memlekettik qyz­met tıimdiligin jetildirýge baǵyt­talǵan. Sonymen qatar, Maks Everest-Fıllıps Sıngapýr ortalyǵy men Asta­na haby arasyndaǵy yntymaq­tas­tyqtyń tıimdiligin aıta kelip, memlekettik qyzmet salasyn­da belsendilik, elgezektik pen ınno­vasııaǵa basa kóńil aýdarý arqyly oılaý men qundylyqtar transformasııasy salasyndaǵy birlesken jumys mańyzdylyǵyn atap ótti. Sondaı-aq, olar eki ortalyq ara­syndaǵy yntymaqtastyqtyń, ásire­se, memlekettik qyzmettegi strate­gııalyq forsaıt quraldaryn paı­da­lana otyryp, «Senimdi bola­shaq boıynsha bastamalar» (Empo­wered Futures Initiative) sheńberinde damýshy elderdiń 2030 jylǵa deıingi Ornyqty damý maqsattaryna qol jetkizýine qoldaý kórsetý boıynsha zor áleýeti bar ekenin atady. Rásim barysynda Á.Baımenov memlekettik qyzmetshilerdiń ju­mys ýaqyty aıaqtalsa da, túnniń bir ýa­ǵyna deıin keńsede otyrýy mem­lekettik organdardyń menedj­mentindegi ózekti máseleniń biri eke­nine toqtaldy. Bul jerde bir­neshe másele bar, dedi ol osy jó­ninde. Laýazym ıeleri arasynda jaýap­kershilikti shekteýdi jetildirý qajet. Ekinshiden, memlekett­ik or­gan­dardyń birazynda qaǵazbastylyq basym. Onyń aıtýynsha, keıbir basshylar jumystan keıin jınalys ótkizýdi unatady, jaqsy kóredi. Sol jıyndardyń nátıjesi, qaıtarymy qalaı bolatynyn zerttep kórý qajet. Álısultan QULANBAI, «Egemen Qazaqstan»