Qazaqstan men Reseı yntymaqtastyǵynyń HIII óńiraralyq forýmy aıasynda «Astana EKSPO-2017» Ulttyq kompanııasy men Reseıdiń elimizben shekaralas aımaqtarynda ornalasqan birqatar oblystarymen arada ózara yntymaqtastyq týraly memorandýmǵa qol qoıyldy.
Bul qujatqa qol jetkizýdegi basty maqsat – EKSPO-2017 halyqaralyq kórmesine reseılik týrısterdi kóptep tartý, jańǵyrmaly energııa kózderine, «jasyl» tehnologııany jetildirýge baılanysty túrli ınvestısııalyq jobalardy zertteý jáne damytý. Sondaı-aq, memorandým týrıstik saladaǵy ınfraqurylymdy damytýǵa yqpal etýge tıis.
Qol qoıý rásiminde Ulttyq kompanııanyń basshysy Ahmetjan Esimov:
– Reseı Federasııasynyń týrıstik operatorlarymen belsendi túrde jumys isteımiz. Bul eldiń shekaralas aımaqta ornalasqan, jalpy sany 34 mıllıon adam turatyn 14 oblysynyń halqy kórmege keledi dep kútilýde. Olardyń arasynda Omby, Astrahan, Sverdlov, Túmen oblystary, Tatarstan Respýblıkasy bar. Búgingi memorandým osy oblystarmen arada yntymaqtastyqty odan ári arttyryp, EKSPO-2017 halyqaralyq kórmesine keletin adamdar sanyn arttyrýǵa yqpal etedi degen oıdamyz, – dep atap ótti.
Jalpy, EKSPO kórmesiniń qandaı dárejede ótkenin aıqyndaıtyn basty eki kórsetkish bar. Ol qansha eldiń at salysqany jáne kórmege qansha adamnyń kelgeni. Ahmetjan Esimovtiń aıtýynsha, Astanadaǵy kórmege bastapqyda 100 el qatysady dep josparlanǵan, bul kórsetkish 103-ke jetip, asyra oryndaldy. Endi 5 mıllıonǵa tarta adamdy tartý úshin kórmeni barynsha tartymdy etip ótkizý máselesi oılastyrylýda.
Ahmetjan Esimov óz sózinde kórmege arnalǵan ǵımarattardyń qurylysyna da toqtalyp ótti. Halyqaralyq shara ótetin aýmaqtyń orta tusynda ornalasqan sfera pishindes ǵımaratta Qazaqstannyń pavılony ornalaspaq. Ǵımarattyń árbir qabaty ǵarysh energııasy, kún energııasy, sý energııasy, kınetıkalyq energııa syndy energııa túrlerin sýretteýge tıis.
Astrahan oblysynyń gýbernatory Aleksandr Jılkın Astanada ótetin aıtýly sharanyń taqyryby búgingi tańda óte ózekti, kreatıvti oılaı biletin adamdar úshin paıdaly dep sanaıdy.
– Bolashaqtyń tehnologııasyna, jańǵyrmaly energııa tehnologııasyna qyzyǵýshylyq tanytatyn, ony óz kózderimen kórý úshin Astanaǵa keletin adamdardyń kóp bolatyndyǵy anyq. Astrahan óńiri jel jıi soǵatyn, kún energııasyn paıdalaný úshin yńǵaıly aımaqta ornalasqanyn eskersek, bizdiń bıznesimiz úshin, iskerlik ortamyz úshin de qyzyqty bolmaq. Bizdiń adamdardyń EKSPO-2017 kórmesin kórý úshin Astanaǵa kelýge degen qyzyǵýshylyǵy joǵary. Qazir Qazaqstannyń týrıstik agenttikterimen tyǵyz baılanys ornatyp, logıstıkany durys qalyptastyrý úshin birlesip jumys istep jatyrmyz, – dedi ol.
«Astana EKSPO-2017» Ulttyq kompanııasynyń esebine súıensek, halyqaralyq kórmeni ótkizýge ázirlik kestege saı júrgizilip jatyr deýge bolady. Kórmege qatysýǵa ótinish bergen elderge arnalǵan pavılondar osy qazan aıynda berile bastamaq. Kórme aıaqtalǵansha Astanada turýǵa tilek bildirgen elderdiń ókilderine arnalǵan páterler de saqadaı-saı. Olar ótinish bergen retine qaraı, qazir daıyn turǵan 1370 páterge qonystana beredi. Kórme aıasynda 3 myńnan astam taqyryptyq jáne mádenı-saýyqtyq is-shara ótkiziledi, etnotýrızmge basymdyq beriledi.
Arnur ASQAROV,
«Egemen Qazaqstan»