Seısenbi kúni Iаltada «Evrazııskıı most» festıvaliniń saltanatty jabylý sharasy ótti. Onda qazaqstandyq rejısser Aqan Sataevtyń «Anaǵa aparar jol» fılmi Gran-prıdi jeńip aldy. Baıqaýǵa Reseı, Ýkraına, Belarýs, Italııa, Germanııa, Serbııa, Qazaqstan, Qytaı, Ońtústik Koreıa, Belgııa, Úndistan, Armenııa sııaqty elderdiń kınoshylary qatysty.
Festıvalde úzdik áıel róli júldesi osy fılmde basty róldi somdaǵan Altynaı Nógerbekke berilgen bolatyn.
«Anaǵa aparar jol» fılminde ana mahabbatynyń kúshi baıandalady. Basty keıipker Ilııas (Ádil Ahmetov) pen onyń anasy (Altynaı Nógerbek) arasyndaǵy uly sezim olardyń basyna týǵan barlyq qıyndyqqa tótep berip, sońynda ana men balanyń qaýyshýyna kómektesedi.
Fılm 1930 jyldan bastap búgingi kúnge deıingi aralyqty qamtıdy. Munda halyqtyń basynan ótken qıyn-qystaý kezeńder (ujymdastyrý, jut, soǵys jyldary) basty keıipkerlerdiń turmys-tirshiligi arqyly berilip otyrady. Basty rólderdi Ádil Ahmetov, Altynaı Nógerbek, Arýjan Jazylbekova, Bolat Ábdilmanov, Berik Aıtjanov, Azamat Satybaldy, Erkebulan Daıyrov, Asylbek Boranbaı somdaǵan. Kartınaǵa jalpy sany 2 myńnan astam adam qatysty. Túsirý jumystary Qazaqstan, Belarýs jáne Ázirbaıjanda júrgizildi. Fılmniń ssenarıı avtory – Tımýr Jaqsylyqov, kompozıtory – Rınat Ǵaısın.
Áıgerim Toqsanbek