Qazaqstan Respýblıkasynyń Syrtqy ister mınıstrligi Amerıka Qurama Shtattary men Reseı Federasııasy arasyndaǵy Sırııadaǵy jaǵdaıdy retteý máselesi tóńiregindegi yntymaqtastyqtyń toqtatylýy týraly málimdemege baılanysty zor ókinish bildiredi.
Málimdeme mátinin vedomstvonyń baspasóz qyzmeti taratty.
"Oqıǵalar barysynyń bul baǵytta damýy osy qasiretti kóp shekken elde qantógis pen adam óliminiń odan ári jalǵasýyna ákelýi múmkin, sondaı-aq budan buryn qol jetkizgen barlyq kelisimder men taıaý bolashaqta jaǵdaıdyń rettelýi perspektıvasyna qaýip tóndirmek. Sırııalyq daǵdarystyń sheshimin izdestirý máselesinde halyqaralyq qaýymdastyqtyń eki negizgi faktory, ıaǵnı RF men AQSh arasyndaǵy kelispeýshilikter jáne ýshyqqan alshaqtyq alańdaýshylyǵymyzdy týdyrýda. Bunyń ózi qaqtyǵys shıelenisýiniń kemı túsýine jáne kúlli Taıaý Shyǵys óńirindegi jaǵdaıdyń turaqtanýyna yqpalyn tıgizbeıdi.
Qazaqstan Respýblıkasy Syrtqy ister mınıstrliginiń 2016 jylǵy 10 qyrkúıektegi málimdemesinde Qazaqstan RF men AQSh arasyndaǵy Sırııalyq daǵdarysty retteý jónindegi ortaq jospardy ázirleýdi kózdegen ýaǵdalastyqty qoldaǵan bolatyn. Sırııadaǵy beıbitshiliktiń ornaýyna úmit bergen bul jospardyń iske aspaǵany bizdiń tereń alańdaýshylyǵymyzdy týdyrýda.
Osyǵan oraı, gýmanıtarlyq daǵdarystyń shıelenisýi men Sırııa halqynyń qaıǵy-qasiretin toqtatý maqsatynda osy másele boıynsha RF men AQSh arasyndaǵy kelissózderdi jedel túrde qaıta qalpyna keltirýge shaqyramyz".
Egemen-aqparat