Jaqynda Mádenıet jáne sport mınıstrligi elimizdegi Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasyn iske asyrý jáne lıngvıstıkalyq saraptama sapasyn arttyrýǵa baǵyttalǵan sharalar jónindegi yntymaqtastyq týraly memorandýmy aıasynda zańnama mátinderiniń memlekettik tildegi nusqalarynyń jáne is qaǵazdaryn júrgizýdiń sapasyn jaqsartý, salalyq termınderdi birizdendirý maqsatynda «Zańnama mátinderi: teńtúp nusqalyqty qamtamasyz etý jáne termınderdi birizdendirý máseleleri» taqyrybynda respýblıkalyq ádistemelik semınar ótkizdi.
Semınarda Prezıdent Ákimshiligi, Premer-Mınıstrdiń Keńsesi, Parlament Senaty men Májilisi apparattarynyń redaksııalaý bólimderiniń, sondaı-aq, Qazaqstan Respýblıkasy Zańnama ınstıtýty Lıngvıstıkalyq ortalyǵy qyzmetkerleri osy saladaǵy ózekti máseleler boıynsha óz oılaryn bildirip, tájirıbelerimen bólisti. Jáne de is-sharaǵa ortalyq jáne jergilikti atqarýshy organdardyń zańdar men basqa da normatıvtik-quqyqtyq aktiler jobalarynyń memlekettik tildegi nusqalaryn ázirleýge jáne redaksııalaýǵa jaýapty mamandary, ulttyq kompanııalar men aksıonerlik qoǵamdardyń memlekettik tilde is qaǵazdaryn júrgizýge jaýapty qyzmetkerleri qatysqanyn da aıta ketsek deımiz.
Sarapshylar men lıngvıster qazirgi ýaqyttaǵy qatelerdi tizbelep, keı aýdarmalardyń qısynǵa kelmeıtinin alǵa tartty. Qatysýshylar qordalanǵan máseleni sheshý úshin til mamandary jumylyp aýdarmaǵa qatysty ortaq mámilege kelýi tıis degen pikirlerin bildirdi. Osy maqsatta bertinde Mádenıet jáne sport mınıstrliginiń muryndyq bolýymen Termınkom.kz saıty ashylǵan bolatyn. Bul portalda resmı bekitilgen termınder tizbegimen tanysa alasyz.
– Búkil termınderdiń tizbesi alfavıttik retpen bizdiń saıtymyzda ornalasqan. Ony kez kelgen adam sol saıtymyzǵa kirip, kez kelgen termınniń durystyǵyn, burystyǵyn kóre alady. О́ıtkeni, qazirgi kezdegi termınderdiń durys nusqasy jáne burys nusqasy jazylǵan, – dedi semınarda sóılegen Mádenıet jáne sport mınıstrligi Tilderdi damytý jáne qoǵamdyq-saıası jumys komıteti tóraǵasynyń orynbasary Ǵalymjan Meldeshov.
– Termınderdi birizdendirý máselesi bir kúnde sheshilip ketedi dep aıta almaımyn. Búgingi jıynǵa qatysýshylar óz isiniń mamandary. Bul kúrdeli másele. Ásirese, zańnama salasyndaǵy termınderdi birizdendirý úlken jaýapkershilik júktep, asqan saýattylyqty talap etedi. Mádenıet jáne sport mınıstrliginiń janynda termınologııalyq komıssııa jumys jasaıdy. Búgingi semınar jumysyna qatysýshy mamandar qajet degen termınderge baılanysty oılaryn bildirip, bir nusqasyn jasap bizge sheshim shyǵarýǵa usynady, – dedi ol qorytyndy sózinde.