«Azamattarǵa arnalǵan úkimet» memlekettik korporasııasy kommersııalyq emes aksıonerlik qoǵamynyń oblystyq fılıaly – Jer kadastry jáne jyljymaıtyn múlikti tehnıkalyq tekserý departamentiniń basshysy Erbol Ábdirahmanov paramen ustalǵanda, oǵan baǵynyshtylar arasynda «e, báse, qashanǵy taltańdap júre bersin, sazaıyn baıaǵyda tartý kerek edi» deýshilerdiń kóp bolǵany anyq. О́ıtkeni, ol osy mekemege jetekshilik etken eki aıdyń ishinde kadrlardy sýsha sapyryp, qoǵasha japyryp, áńgirtaıaq oınatqan. Birine jumystan shyǵaramyn dep azý tisin aqsıtsa, ekinshisine qyzmet baby boıynsha qamqorlyq jasaıtynyn aıtyp, qomaqty para talap etken.
Qostanaı jaqtaǵy bylyq-shylyqtaryn jasyrý úshin beri qaraı taban jaltyratqany jaıly kezinde BAQ-tar jarysa jazǵan bolatyn. Júrgen jerin ýlatyp-shýlatqan ony Qyzyljar óńirindegi tehnıkalyq túgendeý bıýrosyna qalaı basshy etip jibergeni túsiniksiz. Al bildeı departamenttiń qulaǵyn ustasymen áı-sháıǵa qaramastan 7 bólim meńgerýshisin tómendetip, olardyń ornyna óziniń sózin eki etpeıtin «lábbaılardy» jaıǵastyrǵan. Aýdandarda da osynsha bólim basshylaryn qatardaǵy maman etip jiberip, senimdi «izbasarlaryn» qonjıtqan.
Kómekeıi kilkildep, jemsaýy búlkildep turatyn E.Ábdirahmanov bul joly 250 myń teńge kóleminde para alý ústinde quryqtaldy. О́ziniń qylmystyq áreketteri barysynda zańsyz túrde 1,5 mıllıon teńge alǵany belgili boldy. Endi ony alda aýyr jaza kútip tur.
О́mir ESQALI,
«Egemen Qazaqstan»
Soltústik Qazaqstan oblysy