Búgin Taldyqorǵanda el Táýelsizdiginiń 25 jyldyǵyna oraı QR Mádenıet jáne sport mınıstrliginiń qoldaýymen «Qazaqstan – Eýrazııa júregi» atty VI Orta Azııa memleketteri teatrlarynyń halyqaralyq festıvali bastaldy.
Festıvalǵa 7 teatr, atap aıtqanda, Tatarstannyń T.A. Mınýllın atyndaǵy Nıjnekamsk tatar memlekettik drama teatry, Qyrǵyzstannyń T.Ábdimomynov atyndaǵy Ulttyq akademııalyq teatry, Tájikstannyń M.Vohıdov atyndaǵy Tájik memlekettik jastar teatry, elimizdegi Báıten Omarov atyndaǵy teatr, Q.Qýanyshbaev atyndaǵy memlekettik akademııalyq qazaq mýzykalyq drama teatry, astanalyq Jastar teatry men B.Rımova atyndaǵy Almaty oblystyq drama teatrlary qatysady.
Festıvaldiń maqsaty – Orta Azııa elderi men Qazaqstannyń mádenı qarym-qatynasyn odan ári nyǵaıtý, qazirgi zamannyń estetıkalyq talabyna saı dramalyq shyǵarmalardyń jańa formalaryn tabý, olardyń dúnıege kelýine yqpal etý.
Buǵan deıin osyndaı festıvaldar Almaty jáne Aqtaý qalalarynda ótken bolatyn. Bıyl Taldyqorǵanda 24 qazannan bastalyp bes kúnge sozylatyn festıvalǵa kórnekti teatr jáne kıno akteri, rejısser, KSRO Memlekettik syılyǵynyń laýreaty, KSRO jáne Qazaqstannyń Halyq artısi, professor Asanáli Áshimov bastaǵan qazylar alqasy tórelik etedi. Qazylar alqasynyń quramynda prozaık, aýdarmashy, dramatýrg, Tájikstan kórkemóner akademııasynyń akademıgi Abdýgaffor Abdýjabborov, teatr synshysy, D.Sırazıev atyndaǵy teatr syılyǵynyń laýreaty, halyqaralyq, búkilreseılik teatr festıvalderi synshylar alqasynyń múshesi Nııaz Iglamov, teatr synshysy, dramatýrg, Qyrǵyz Respýblıkasy Teatr qaıratkerleri odaǵynyń tóraǵasy Janysh Kýlmanbetov, Ázerbaıjan memlekettik jas kórermender teatrynyń bas rejısseri, Ázirbaıjan memlekettik mádenıet jáne óner ýnıversıteti «Drama teatrynyń rejıssýrasy» kafedrasynyń meńgerýshisi, dosent Bahram Osmonov bar.
Festıvaldiń ashylý saltanatyn quttyqtaý sózben ashqan oblys ákiminiń orynbasary Baqtııar О́nerbaev qonaqtarǵa jáne sharaǵa qatysýshylarǵa sáttilik tiledi. Sonymen qatar, Qazaqstan Respýblıkasy Mádenıet jáne sport mınıstrliginiń jaýapty ókili Gúlnafıs Myrzasheva men Tatarstan ókili Nııaz Iglamov óz lebiz-tilekterin jetkizdi.
Almaty oblysy ákimdiginiń baspasóz qyzmetiniń málimetinshe, festıval aıasynda T.Slobodzıanektiń «Odnoklasnıkı. Ýrokı jıznı», Sh.Aıtmatovtyń «Ana – Jer ana» jáne «Sabanshynyń joly», B.Rımovanyń «Qos muńlyq», A.Chehovtyń «Shıe», B.Sobırdiń óleńiniń jelisi boıynsha «Noch vdaleke ot Rodıny», Ý.Shekspırdiń «Asaýǵa tusaý» spektaklderi qoıylady. Qoıylymdar kúndelikti B. Rımova atyndaǵy oblystyq drama teatrynda saǵat 12.00-de jáne keshki 18.00-de ótedi. Kirý tegin.