Premer-mınıstr orynbasary – Mádenıet jáne aqparat mınıstri Aıda Balaeva Shymkent qalasyna jumys sapary barysynda mádenıet salasyndaǵy irgeli jobalardy pysyqtap, shahardyń týrıstik áleýetimen, qoǵamdyq keńistikterdiń damý barysymen tanysty. Sonymen qatar Memleket basshysy Qasym-Jomart Toqaevtyń atynan mýzykalyq bilim salasy qyzmetkerlerine memlekettik marapat tapsyrdy.
Marapattaý rásiminde Aıda Balaeva óner salasynyń ustazdary mádenı qundylyqtardy saqtap, keńinen nasıhattaýda, sondaı-aq óskeleń urpaqtyń shyǵarmashylyq áleýetin qalyptastyrýda aıryqsha ról atqaratynyn atap ótti.
Ulttyq qundylyqtardy dáripteýge jáne kúı ónerin keńinen nasıhattaýǵa baǵyttalǵan «Kúı kúmbiri» respýblıkalyq aksııa-syn uıymdastyrý men ótkizýge qosqan úlesi úshin Prezıdent Jarlyǵymen birqatar pedagog marapattaldy. Atap aıtqanda, «Qurmet» ordeni Y.Altynsarın atyndaǵy №65 mektep-gımnazııasynyń mýzyka páni muǵalimi Gúlfaırýz Eljanovaǵa, «Eren eńbegi úshin» medali №46 mektep-lıseıdiń mýzyka páni muǵalimi Erkejan Namazovaǵa, sondaı-aq «Alǵys» gramotasy №58 jalpy orta bilim beretin mekteptiń mýzyka páni muǵalimi Gúlzıra Darjanovaǵa tabystaldy.
Úkimet basshysynyń orynbasary osy jumys sapary aıasynda Shymkent sıtadeline baryp, mýzeı ekspozısııalaryn tamashalady. Is-shara barysynda tarıhı-mádenı murany saqtaýdyń mańyzyna toqtaldy. Sondaı-aq etnoaýylda bolyp, mundaı nysandardy arhaıkaǵa boı aldyrmaı, zamanaýı, kreatıvti ári ınnovasııalyq formatta damytý qajettigin atap ótti.
Vıse-premer Arbat jaıaý júrginshiler alleıasyn da aralap, qalalyq mádenıet, gastronomııa jáne kreatıvti ındýstrııa salalaryndaǵy birqatar jobamen tanysty. Bul rette ol osy aýmaqta bos jumys oryndary men jastarǵa arnalǵan maýsymdyq kásiptik baǵdar aqparattaryn beretin jumyspen qamtý ortalyǵyn ornalastyrý múmkindigin qarastyrýdy usyndy.
Sonymen qatar kreatıvti ortany damytýǵa, jas talanttardy qoldaýǵa, mádenı mura men ınnovasııalyq tásilder úndesken zamanaýı qalalyq ınfraqurylymdy qalyptastyrýǵa erekshe nazar aýdaryldy.
Osy kúni Aıda Balaeva Shymkent qalasyndaǵy «Jastar» teatryna baryp, Muhtar Áýezovtiń «Eńlik – Kebek» tragedııasy jelisinde sahnalanǵan spektakldi tamashalady.
Qoıylym – qazaq dramatýrgııasynyń altyn qoryna engen, ult rýhy men halyqtyń tarıhı taǵdyryn tereń beıneleıtin kórnekti týyndy. Teatr ujymy spektakldi jańa rejısserlik sheshimmen usynyp, klassıkalyq shyǵarmany zamanaýı sahnalyq til arqyly jańasha paıymdaǵan.
Vıse-premer teatr ujymynyń tynys-tirshiligimen tanysyp, qyzmetkerlermen kezdesý ótkizdi.
«Memleket basshysy mádenıet salasyna erekshe mán beredi. Prezıdent ult rýhyn asqaqtatyp, rýhanı tutastyqty nyǵaıtyp júrgen mádenıet qaıratkerleriniń eńbegin árdaıym joǵary baǵalaıdy», dedi ol.
Bıyl «Jastar» teatrynyń ashylǵanyna bir jyl tolyp otyr. Qazirgi ýaqytta teatr repertýarynda 10 qoıylym bar. Jas teatr halyqaralyq deńgeıde de tanylyp úlgerdi. 2025 jyly Aljırde ótken «The International Cultural Festival of Desert Theatre» festıvalinde bas júldeni jeńip aldy. Sonymen qatar 2026 jylǵy sáýirde Fransııadaǵy GRRRANIT – Scène nationale de Belfort teatry-men yntymaqtastyq týraly memorandýmǵa qol qoıyldy. Buǵan qosa teatr Italııa, Koreıa, Kanada elderindegi áriptesterimen baılanys ornatyp, birlesken jobalardy júzege asyrý jáne halyqaralyq festıval uıymdastyrý baǵytyndaǵy múmkindikterdi qarastyryp otyr.
Búginde teatr ujymynda 145 adam eńbek etedi. Onyń ishinde 50 ártis jáne 18 shyǵarmashylyq quram ókili bar.