Saýd Arabııasynyń Metal corners holding kompanııasy Qazaqstannyń jer qoınaýyndaǵy polımetall, altyn, kúmis jáne mys kenderine geologııalyq barlaý jasaý úshin 50 mln dollar bóletin boldy. Bul ýaǵdalastyqqa qatysty kelisimge Metal corners holding kompanııasy men «Qazgeologııa» ulttyq geologııalyq barlaý kompanııasy» AQ basshylary qol qoıdy.
«Biz Metal corners holding kompanııasymen ózara kelisim jasadyq. Kelisimge saı, Qazaqstannyń jer qoınaýynan polımetall, mys, altyn, kúmis sekildi paıdaly kenderge geologııalyq barlaý jasýǵa múmkindik týady. Kelisimniń quny shamamen 50 mln dollardy quraıdy. Alaıda, bul – kelisimniń birinshi satysy. Eger de bolashaqta bul baǵyttaǵy jumystar óz nátıjesin berip jatsa, arabtar ol jerge ınnovasııalyq zaýyttar men fabrıkalar salýǵa daıyn, – deıdi «Qazgeologııa» AQ basqarma tóraǵasy Ǵalym Nurjanov.
Onyń aıtýynsha, barlaý jumystaryn tolyǵymen «Qazgeologııa» kompanııasy júrgizedi. Úkimettiń shaǵyn qalalardy damytý týraly qaýlysyna saı, ken oryndaryn monoqalalardyń mańynan izdeý jónindegi jospar bar. «Sondaı qalalardyń janynda geohımııa jumystaryn, geofızıka esepterin júrgizip, bolashaǵy zor oryndardy anyqtadyq. Osyndaı aımaqtarǵa ınvestor tartýǵa daıynbyz», – deıdi Ǵ.Nurjanov.
«Qazgeologııa» basshysynyń aıtýynsha, Metal corners holding kompanııasy arab jerindegi polımetall, altyn men qorǵasyn qoryna baı jerlerdiń ıesi. Bul kompanııa óz elderiniń ishki naryǵyn ıgerip, syrtqy naryqqa jol izdep otyr. Qazaqstanda ınnovasııalyq jobalaryn júzege asyrýǵa daıyn. Eger olar monoqalalardyń mańynda zaýyttar sala bastasa, óńirlerdiń damýyna óz yqpalyn tıgizetin bolady.
Joldybaı Bazar, "Egemen Qazaqstan".