2000
*13 maýsymda Qazaqstan Prezıdenti Nursultan Nazarbaev resmı saparmen Tájikstan Respýblıkasynyń astanasy Dýshanbege bardy. Taraptar kezdesýinde halyqaralyq jáne aımaqtyq qaýipsizdiktiń ózekti máseleleri talqylandy.*
*15 maýsymda kórnekti jazýshysy Sábıt Muqanovtyń ǵasyrlyq toıy qalamgerdiń týǵan jerinde túıindeldi. Mereıtoıǵa Prezıdent Nursultan Nazarbaev qatysyp, sóz sóıledi. Bul týraly «Egemen Qazaqstan» gazetiniń 17 maýsym kúngi nómirinde «Jaqsy jannyń toıynda nur jaýady» taqyrybymen maqala jarııalandy.
*18-21 maýsym aralyǵynda Qazaqstan Prezıdenti N.Á.Nazarbaevtyń Reseı Federasııasyna resmı sapary ótti. V.Pýtın Qazaqstan Prezıdentiniń saparyna Reseıde zor mán berilip otyrǵanyn aıta kelip, óziniń shaqyrýyn qabyl alǵany úshin Nursultan Nazarbaevqa alǵysyn jetkizdi. Elbasy sapar aıasynda TMD elderi basshylary Memleketaralyq keńesiniń kezekti májilisine qatysty.
*26 maýsymda Qazaqstan Prezıdenti Nursultan Nazarbaevtyń Belgııaǵa sapary bastaldy. Belgııa koroli Albert II men NATO-nyń bas hatshysy lord Dj. Robertsonmen, Belgııanyń premer-mınıstri J.-L. Deanmen, Eýropalyq komıssııanyń prezıdenti R.Prodımen kezdesýlerde eki jaqty jáne halyqaralyq qatynastardyń kóptegen kúrdeli máseleleri talqylandy.
*28 maýsymda Qazaqstan Prezıdentiniń Fransııaǵa resmı sapary bastaldy. Fransııa prezıdenti Jak Shırakpen, eldiń Premer-mınıstri Lıonel Jospenmen, Fransııa ulttyq jınalysynyń tóraǵasy R.Fornımen kezdesýler ótkizildi.
*3 shildede Qaraǵandy metallýrgııa kombınatynda qazaqstandyq tuńǵysh shoıyn balqytylǵanyna 40 jyl toldy. Oǵan sol kezdegi jas metallýrg Nursultan Nazarbaev ta qatysqan. Osy oqıǵaǵa oraı Prezıdent N.Á.Nazarbaev Temirtaýda boldy.
*4 shildede Prezıdent N.Á.Nazarbaev Astanada NATO-nyń Bas hatshysy lord Dj.Robertsonmen kezdesti. Kelissózderde Qazaqstan men NATO arasyndaǵy yntymaqtastyqty ári qaraı damytý, «Beıbitshilik úshin seriktestik» baǵdarlamasyn iske asyrý jaıttary qarastyryldy. Sondaı-aq, osy kúni Qazaqstannyń aldynan asa jarqyn kókjıek ashyldy: Atyraý oblysyndaǵy Shyǵys Qashaǵannan munaıdyń orasan mol qory tabyldy. Bul jańalyqty aıdaı álemge Prezıdent Nursultan Nazarbaev jarııa etti.
*5 shildede Dýshanbede «Shanhaı bestigine» qatysýshy memleketter basshylarynyń kezekti sammıti ótti.
*6 shildede Qazaqstan Respýblıkasynyń Prezıdenti Nursultan Nazarbaev alpys jastyń asqaryna kóterildi. Mereıtoı qarsańynda Elbasynyń atyna el azamattarynan, kóptegen elderdiń basshylarynan, mádenıet pen óner qaıratkerlerinen quttyqtaýlar kelip tústi.
*18 tamyzda Iаltada TMD elderi basshylarynyń kezekti kezdesýi bolyp ótti. Sammıt qatysýshylary Ortalyq Azııadaǵy jáne Tájikstannyń taýly shekaralaryndaǵy jaǵdaıdy talqylady.
*20 tamyzda Bishkekte Ortalyq Azııa memleketteriniń basshylary men Reseı Prezıdentiniń kezdesýi boldy.
*23 tamyzda Prezıdent N.Á.Nazarbaev «Qazaqstan Respýblıkasynyń Ulttyq qoryn qurý týraly» Jarlyqqa qol qoıdy.
*4 qyrkúıekte Qazaqstan Prezıdenti Londonǵa sapar jasap, Eýropalyq qaıta qurý jáne damý bankiniń prezıdenti J.Lemermen, «BAE Systems» aeroǵarysh kompanııasynyń dırektory Dj.Vestonmen jáne Ulybrıtanııanyń eks-premeri M.Tetchermen kezdesti.
*6 qyrkúıekte Nıý-Iorkte BUU Bas Assambleıasynyń 55-shi sessııasy sheńberinde Myńjyldyq sammıti ashylyp, onda Elbasy «Qaýipsizdik jáne yntymaqtastyq – ǵalamdyq jáne aımaqtyq aspektiler» taqyrybynda baıandamasyn jasady.
*9 qazanda Reseı Prezıdenti Vladımır Pýtın resmı saparmen Qazaqstanǵa keldi. Ekeýara suhbatta el basshylary ekonomıkalyq yntymaqtastyq salasynda oń úrdister eki jaqtyń ózara tıimdi áriptestikke umtylysynyń nátıjesinde múmkin bolyp otyrǵanyn atap ótti. Kelissózder Kaspıı teńiziniń quqyqtyq mártebesine baılanysty Reseı men Qazaqstannyń kózqarasy ortaq ekendigin kórsetti. Atalǵan sapar sheńberinde ekijaqty yntymaqtastyq máseleleri de talqylanyp, Qazaqstannyń Astrahanda konsýldyǵyn jáne Reseı Federasııasynyń Oralda konsýldyǵyn ashý týraly kelisimge qol qoıyldy.
*10 qazanda Astanada Kedendik odaqqa qatysýshy elder – Belarýs, Qazaqstan, Qyrǵyzstan, Reseı jáne Tájikstan basshylary Memleketaralyq keńesiniń kezekti májilisi boldy. Májilis jumysyna memleket basshylary A.Lýkashenko, N.Nazarbaev, A.Aqaev, V.Pýtın jáne E.Rahmonov katysty. Memleket basshylary Eýrazııalyq Ekonomıkalyq Qaýymdastyqty (EýrAzEQ) qurý týraly shartqa qol qoıdy.
*11 qazanda Ujymdyq qaýipsizdik týraly kelisimge (UQK) múshe elderdiń basshylary Bishkekte bas qosty. Ujymdyq qaýipsizdiktiń aımaqtyq kúshterin qurý týraly sheshim qabyldandy.
*16 qazanda Semeıde Ertistiń ústinen tartylǵan kópirdi ashý saltanaty boldy. Lentasyn Prezıdent Nursultan Nazarbaevtyń ózi qıǵan bul ǵalamat kópirdiń uzyndyǵy – 250, bıiktigi – 90, al eni – 35 metr. Kópir ústindegi alty qatar joldyń árqaısysynyń eni 4 metrge jýyq.
*19 qazanda Túrik Respýblıkasynyń Prezıdenti Ahmet Nejdet Sezer resmı saparmen Qazaqstanǵa keldi. Kezdesý barysynda saýda-ekonomıkalyq ózara is-qımyl máseleleri talqylandy.
*20 qazanda Túrkistannyń 1500 jyldyq torqaly toıy bastaldy. Alǵashqy kúngi ǵylymı-praktıkalyq konferensııada Prezıdent Nursultan Nazarbaev sóz sóıledi. «Jańa ǵasyr, jańa myńjyldyqty bereke kóbeıter birlikpen, yrys kóbeıter yntymaqpen bastaǵanymyz lazym. Dál osynaý kıeli Túrkistan tórinde, áýlıe Áziret Sultannyń irgesinde ótip jatqan uly dýman sondaı jalpyulttyq jarastyqtyń, jappaı arylý men tazarýdyń jıynyna aınalyp, jaqsy bastamanyń basy bolǵaı. Búgingi dýmanda bar bolmysymen jarqyraı kóringen tatý-tátti kórshilestigimiz, týysqandyq birligimiz, izgi nıetti yqpaldastyǵymyz ben yntymaǵymyz baıandy bolǵaı. Oılaǵanymyz ońynan oralyp, kózdegenimiz kókeıden shyǵa bergeı!», dedi Prezıdent. Bul týraly
«Egemen Qazaqstan» gazetiniń 21 qazan kúngi nómirinde «Totydaıyn taranǵan Túrkistan barsha túrkiniń rýhyn jańǵyrtýda» taqyrybymen maqala jarııalandy.