Ázirbaıjan Batys Qazaqstan oblysynan bir mıllıon tonna astyq satyp alady. Bul týraly Qazaqstandaǵy Ázirbaıjan Respýblıkasynyń tótenshe jáne ókiletti elshisi Rashad Mammadov málimdedi, dep habarlaıdy egemen.kz BNews.kz-ke silteme jasap.
Batys Qazaqstan oblysynyń Kásipkerler palatasynda Ázirbaıjannan kelgen delegasııamen kezdesý ótti. Delegasııanyń bastap kelgen Rashad Mammadov Ázirbaıjan men BQO arasyndaǵy taýar aınalymy 25%-ǵa óskendigin aıtty.
«Biz jyl saıyn Qazaqstannan astyq alamyz. Jospar boıynsha 2016 jyly 1 mln tonnaǵa jýyq alamyz. Sondaı-aq, Qazaqstanǵa óz ónimimizdi eksporttaımyz dep otyrmyz», – dedi R. Mammadov.
Batys qazaqstandyq kásipkerlerge «Aqtaý» teńiz portynda ornalasqan logıstıkalyq ortalyqtyń múmkindikteri týraly aıtyldy. Ázirbaıjan qazir tabıǵı resýrstary men paıdaly qazbasy jáne utymdy saıasatynyń arqasynda ekonomıkalyq damyǵan elderdiń qataryna kiredi. Munda iri ınfraqurylym jobalary iske asyrylyp jatyr. Aýyl sharýashylyǵy óndirýshilerin tehnıkamen qamtamasyz etý úshin agroparkter qurylǵan.
«О́ńirimizdiń aýyl sharýashylyǵy ónimin qaıta óńdeý salasyndaǵy agrarııa men kásiporyndar Ázirbaıjanǵa tek un ǵana emes, makaron ónimderin, et, qymyz, shubat, jún men teri jetkizýge daıyn. Ázirbaıjan kásiporyndarynyń 90%-y ımporttyq shıkizatty paıdalanady», – dedi BQO aýyl sharýashylyǵy basqarmasynyń basshysy Marat Ońǵarbekov.
Kezdesý sońynda qazaqstandyq tarap jergilikti zaýyttar men iri taýar óndirýshilerdiń kommersııalyq usynystaryn kórsetti. Sondaı-aq, sapar barysynda Rashad Mammadov BQO ákimi Altaı Kólginovpen ekonomıkalyq yntymaqtastyq máselelerin talqylaý úshin kezdesti.