Taıaýda Bishkekte túrki halyqtarynyń uly oıshyly Júsip Balasaǵunnyń 1000 jyldyǵy men Qazaqstan Táýelsizdiginiń 25 jyldyǵyna arnalǵan «Dostyq» festıvali ótti. Halyqaralyq festıval aıasynda ótken ǵylymı-tájirıbelik konferensııada tarbaǵataılyq 7-synyp oqýshysy Elerke Jamaǵatova Gran-prıge ıe boldy.
Jántikeı aýylynyń Q.Sátbaev atyndaǵy orta mektebinde oqıtyn Elerke Jamaǵatova týǵan jeriniń tarıhyn túgendep júrgen búldirshin. Ol áıgili halyq emshisi Yrǵyzbaı Doshanaulynyń ómiri men onyń emge paıdalanǵan dárilik shópteri týraly ǵylymı-zertteý eńbegimen «júzden júırik, myńnan tulpar» shyǵyp, týǵan eliniń mereıin kóterdi.
Konferensııada daryndy balalardy qoldaý men damytý baǵytynda respýblıkalyq «Daryn» ǵylymı-tájirıbelik ortalyǵymen birlese jumys istep kele jatqan ustazy Alma Temirjanova da marapattaldy. Sondaı-aq, mekteptiń oqý isiniń meńgerýshisi Ardaq Ojaeva I oryndy enshiledi. Júldeli oryndar úshin dıplom men baǵaly syılyqtarǵa ıe bolǵan oqýshy, ustaz jáne oqý meńgerýshisi Ystyqkólge, «Rýh-Ordo» ashyq aspan asty murajaıyna jáne Cholpon ata qalasyna saıahattap qaıtty.
Dýman ANASh,
«Egemen Qazaqstan»
Shyǵys Qazaqstan oblysy