Memleket basshysy «Qazaq eli» kınofılminiń kórsetilimine bardy dep habarlaıdy Aqordanyń baspasóz qyzmeti. Elbasynyń ózi ıdeıa avtory bolyp sanalatyn kınoepopeıa Mádenıet jáne sport mınıstrliginiń tapsyrysy boıynsha Sháken Aımanov atyndaǵy «Qazaqfılm» aksıonerlik qoǵamynyń kınostýdııasynda túsirilgen.
Qazaqstandyq jańa tarıhı kınotýyndyǵa qazaq ádebıetiniń klassıgi Ilııas Esenberlınniń «Kóshpendiler» trılogııasynyń birinshi kitaby – «Almas qylysh» romany negiz bolǵan. Fılmdegi oqıǵalar XV ǵasyrda órbıdi. Oǵan Jánibek pen Kereı handar tusyndaǵy qazaq memlekettiliginiń qalyptasýy barysyndaǵy basty oqıǵalar arqaý bolady.
Kóp serııaly telejoba jumysyna respýblıkadaǵy tanymal kınomatografıster – qoıýshy rejısser Rústem Ábdirashev, ssenarıster Smaǵul Elýbaev pen Tımýr Jaqsybekov atsalysty. Jalpy, bul fılmdi túsirý jumysyna 500 adam tartylǵan.
«Qazaq eli» týyndysy taıaý arada jalpyulttyq prokatqa shyǵarylady.