Parlament Májilisiniń sársenbide ótken jalpy otyrysynda depýtat Ersultan Bekturǵanov Premer-Mınıstr Baqytjan Saǵyntaevqa depýtattyq saýal joldaǵan bolatyn. Onda bylaı delinedi:
«Ortalyq Azııa tarıhynda Astana qalasynda tuńǵysh ret ótetin «EKSPO-2017. Bolashaq energııasy» atty kórmeniń ashylýyna da 220 kún qalypty. Kelesi jylǵy maýsymnyń 10-ynan qyrkúıektiń 10-yna deıin úsh aı ishinde bas qalamyzǵa 5 mıllıonǵa jýyq qonaq pen týrıst keledi dep boljanýda. Kórme aıasynda sheteldik qonaqtardy Uly Dalamyzdyń tamasha tabıǵatynyń úlgisi bolyp sanalatyn Býrabaı ulttyq tabıǵı parkine aparý josparlanyp otyr.
Biraq, búgingi tańda sol jerge aparatyn, dúnıejúzilik úlgide salynǵan «Astana – Býrabaı» tas joly boıyndaǵy servıstik qyzmetter kórsetý deńgeıi eshqandaı syn kótermeıdi. Tóselgen avtoban HHI ǵasyrdy kózge elestetse, jol boıynda salynǵan avtoturaqtardaǵy ájethanalar ótken ǵasyrdy eske salady.
Olarda jylý kózderi, sýmen qamtamasyz etý atymen joq bolsa, túngi ýaqytta ol jerlerge, jaryqtyń joqtyǵynan kirýdiń ózi qorqynyshty. Olardy der kezinde tazartyp, sanıtarlyq normada ustaý jumystary múldem júrgizilmeıdi. Bul jol – Qazaqstandaǵy alǵashqy aqyly avtoban retinde jylyna bir mıllıard teńgeden astam qarjy túsirip otyrsa da, jolaýshylar men júrgizýshilerge qajetti jaǵdaı jasalmaı otyrǵany ókinishti-aq.
Jalpy, aıtylǵan kemshilikter tek qana osy jolǵa ǵana qatysty emes. Resmı málimetter boıynsha, elimizdegi respýblıkalyq jáne halyqaralyq joldardaǵy servıstik qyzmet kórsetýlerdiń 80 paıyzǵa jýyǵy ulttyq standarttarǵa saı emes eken.
Bul máseleniń sheshimin tabý úshin tıisti mınıstrlikter jáne osy joldar ótetin óńirlerdiń ákimshilikteri jol boıyna salynatyn qurylys nysandaryna jańa talaptar qoıyp, olardyń halyqqa sapaly qyzmet kórsetýin qatań baqylaýǵa alsa eken deımiz.
Al «Astana–Býrabaı» avtobanyna baılanysty aıtatyn bolsaq, halyqaralyq EKSPO-2017 kórmesi ashylǵanǵa deıin atalǵan jol boıyndaǵy servıstik alańdardy shuǵyl túrde ulttyq standarttar talaptaryna sáıkestendirýdi suraımyz.
Halqymyzda «Kelgenshe qonaq uıalady, kelgen soń úı ıesi uıalady» degen bar. Sondyqtan, halyqaralyq deńgeıdegi is-sharanyń sheńberinde elimizge kóptegen meımandar men qonaqtar kelgende, uıatqa qalmasaq eken degimiz keledi».