El Táýelsizdiginiń 25 jyldyq toıy qarsańynda kenshiler astanasy kóshe tazalaıtyn tehnıkaǵa qaryq boldy. Oblys ákimi Nurmuhambet Ábdibekov kommýnaldyq qyzmetshilerge jalpy quny 1 mlrd teńge bolatyn tehnıka túrleriniń kiltin saltanatty jaǵdaıda tabys etti. Bul mamandandyrylǵan arnaıy tehnıkanyń barlyǵy 2020 jylǵa deıin aımaqtardy damytýǵa arnalǵan baǵdarlama aıasynda oblystyq bıýdjetten bólingen qarjyǵa satyp alynǵan.
«Qaraǵandy – alyp qala. Oblys ortalyǵynda 250 kóshe bar, buǵan 200-den asatyn ártúrli ótpe joldaryn qosyńyz. Sanıtarlyq tazalaýdy talap etetin alańnyń jalpy aýmaǵy shamamen bes mıllıon sharshy metrdi qamtıdy. Árıne, osyndaı aýmaqty tazalap, tártipte ustap otyrý ońaı sharýa emes. Aldaǵy ýaqytta osy tehnıka qalanyń qajettiligin óteıdi degen oıdamyn. Aıta keterligi, satyp alynǵan tehnıkalar arasynda otandyq ónim de bar», dep atap ótti óńir basshysy.
Jańadan alynǵan tehnıka túrleri, atap aıtqanda júk tıegishter, aryq tazalaǵysh mashınalar, jolaýshylar avtobýstary, ámbebap traktorlar, jol tazalaýshy, júkti ózi aýdaratyn mashınalar men vakýýmdy shańsorǵyshtar, avtogreıderler kommýnaldyq qyzmetkerlerdiń jumysyn aıtarlyqtaı jeńildep, qala kósheleriniń muntazdaı taza bolýyna súbeli úles qosary sózsiz.
Qaırat ÁBILDINOV,
«Egemen Qazaqstan»
QARAǴANDY