Eger aıazdy kúnderi jolda qalyp qoısańyzdar, kólikterińiz buzylsa, óz betterińizben qımyldap, tyǵyryqtan shyǵamyn dep tyryspańyzdar, óıtkeni, ómirińizge qaýip tónip tur, dep málimdeme jasady Semeıdegi Tótenshe jaǵdaılar basqarmasy. Ondaı jaǵdaılarda ýaqyt ozdyrmaı 112 nemese 101 telefonyna habarlasqan jón. Oblystyq Tótenshe jaǵdaılar departamentinen habarlaǵandaı, mal qaraımyn dep 14 qarasha kúni úıinen shyǵyp ketken shopan adasyp ketipti. Adasqanyn sezse kerek, bir ret qońyraý shalyp úlgeripti. Sol kúni qutqarýshylar da izdeýge shyqqanymen, kún raıy buzylyp, alaı-dúleı boran soqqan edi. 12 saǵattan keıin Qyzemshek aýylynan 15 shaqyrym jerde 50 jastaǵy turǵyn tabyldy. Onyń qasynda iri qara mal da bolǵan. Shopannyń úsigeni óz aldyna, bir táýlikke jýyq ash jatypty. TJ ókilderi oǵan ystyq shaı berip, esin jıǵyzyp, úıine jetkizdi.
Qazir oblysta aýa temperatýrasy 30 gradýsqa deıin tómendegen. Sondaı-aq, Semeı men Pavlodar oblysy arasyndaǵy jolaýshyǵa lyq toly avtobýs aqtútek boranda qańtarylyp qalǵan. Qutqarýshylar bir kún ishinde Ombyǵa baǵyt alǵan Pavlodar mańyndaǵy úsh birdeı avtobýstyń amalsyz aıaldaǵanyn aıtady. Búginde sary shunaq aıaz turyp, mektepter men kolledjderde sabaq toqtaǵan. Al súıekten ótetin sýyqqa adam túgili temir kólik te shydaı almaýda. Qazir mektep oqýshylary men kolledjderdiń 1-2-kýrstary merzimsiz demalysqa shyqqan. TJ mamandary kún saıyn jolda qalǵandardy shyǵaryp alýmen aınalysýda. Tipti, aıaz kólik talǵamaıtyn boldy, jeńil kólik, sheteldik sándi kólik, júk mashınalary deısiz be, birinen keıin biri qırap jatyr.
Máselen, 16 qarasha kúni 112 telefonyna, saǵat 11.00 kezinde aqparat tústi. Onda Semeı turǵyny eki balasyn alyp, «Myrzaǵul» qystaǵynan shyqqan eken. Qasynda áıeli bar. 12 shaqyrym júrip ótken kezde dalada qalyp qoıady, ıaǵnı Semeı-О́skemen jolynyń boıynda kóligi aıazǵa shydas bermeı buzylǵan. Bul tusqa «PCh-7» dep atalatyn, basshysy A. Tileýbaevpen birge qutqarýshylar jasaǵy shyqty. «ARM-137» avtokóligimen baryp, tórt adamdy qutqaryp ákeldi.
Mine, osyndaı jaǵdaılar kóptep oryn alýda. TJ basqarmasy aıazdy kúnderi dalaǵa shyqpańyzdar, ózderińizdiń jáne týystaryńyzdyń ómirin, densaýlyǵyn oılaǵan jón dep eskertip jatyr.
Raýshan Nuǵmanbekova
SEMEI