Ulttyq valıýta – kez kelgen táýelsiz memlekettiń ajyramas bir belgisi. Osydan jıyrma úsh jyl buryn tól teńgemiz ómirge kelip, aınalymǵa shyqqanda alys-jaqyn aǵaıynnan súıinshi surap, bórkimizdi aspanǵa ata qýanǵan edik. Bul neni bildiredi? Bul – ǵasyrlar boıy azattyqty ańsaǵan eldiń, Táýelsiz memleket azamattarynyń óz aldyna derbes ekonomıkalyq tirshilikke qýanýy edi. Qazaq topyraǵyna aıaq basqan árbir adam qajettilikten qolyna ustaıtyn aqshaǵa ultymyzdyń betke ustar maqtanyshtaryn – Ábý Nasyr ál-Farabıden bastap, Súıinbaı, Qurmanǵazy, Shoqan, Abaı, Ábilqaıyr, Abylaı beınelerin saldyq. Sonyń bári sol kezde aýyzben aıtyp jetkizgisiz qýanysh ári uly maqtanysh edi! 1993 jyldyń qarashasynda teńgeniń aınalymǵa shyǵarylýy bizdiń jas táýelsiz respýblıkamyzdyń jylnamasyndaǵy eń mańyzdy oqıǵalardyń biri bolǵany anyq.
Memleketimizdi san qyspaq pen qysyltaıań shaqtardan aman-esen alyp shyǵyp, búgingideı mamyrajaı zamanǵa bastap ákelgen Elbasymyz Nursultan Ábishuly Nazarbaev árdaıym sondaı memlekettik deńgeıdegi ıgi isterdiń basy-qasynda boldy. Qazaqstan Respýblıkasynyń Tuńǵysh Prezıdenti retinde onyń sýretin alǵashqy teńgelerdiń birine basqanda da ábden laıyq edi dep oılaımyn. Ony halyq sol kezdiń ózinde-aq qoldar edi. Qazaq tilinde arhaızmge aınalǵan «teńge» sózin jańa valıýtamyzǵa teligen de Nursultan Ábishulynyń ózi bolatyn.
Desek te, «Jaqsylyqtyń erte-keshi joq», el Táýelsizdiginiń 25 jyldyq mereıtoıy qarsańynda jaryqqa shyqqan 10 myń teńgelik jańa kýpıýraǵa Elbasynyń sýreti bederlengeni óte oryndy boldy. Shynynda da, memlekettiń birinshi basshylarynyń beınesin ulttyq valıýtada bederleý álemdik tájirıbede burynnan bar. Halqyna sińirgen ushan-teńiz eńbegi, memlekettik qaıratker retindegi kelbeti bolsa, bul qaıta quptarlyq is emes pe!? Qudaıǵa shúkir, bizdiń Elbasymyz – dosqa da, dushpanǵa da «Meniń Prezıdentim!» dep maqtanyshpen kórsetýge laıyq tulǵa.
Táýelsiz elimizge búginde syrttan túrli maqsattarmen aǵylyp kelip-ketip jatatyn adamdar kóp. Shetelderden kelgen qonaqtardyń qaı-qaısysy da qazaqtyń teńgesin ustap kórmeı ketpeıdi. Saıasatpen de, halyqaralyq qatynastarmen de sharýasy joq beıtarap adamdardyń ózi ulttyq valıýtadaǵy tulǵany eriksiz kóredi. Iаkı, bul bir jaǵynan, Qazaq eli úshin úlken jarnama. Sondyqtan men óz basym Ulttyq banktiń Elbasy portretin jańa qazaqstandyq banknotqa beıneleý týraly sheshimin qoldaımyn. Nursultan Nazarbaevtyń Táýelsiz Qazaqstannyń negizin qalaǵan memlekettik tulǵa ekenine eshkim talasa almaıdy. Qazaqstannyń shırek ǵasyr ishinde qol jetkizgen jetistikteriniń bári de Prezıdentimizdiń esimimen tyǵyz baılanysty. Álem halqy Qazaqstan dese – Nazarbaevty, Nazarbaev dese – Qazaqstandy biledi. Memleket tizginin shırek ǵasyrdan artyq myǵym ustap, týǵan halqyn damýdyń dańǵyl jolymen jetelep kele jatqan Memleket basshysy budan da zor qurmetterge laıyq dep bilemin!
Qýanysh OMAShEV,
Elbasynyń seriktesi, ardager metallýrg, «Parasat» jáne «Qurmet» ordenderiniń ıegeri, Shet aýdany men Temirtaý qalasynyń qurmetti azamaty
Qaraǵandy oblysy,
Temirtaý qalasy