Sınoptıkter 2016 jyldyń 19-21 qarasha kúnderine arnalǵan aýa raıy boljamyn jarııa etti, - dep habarlaıdy egemen.kz "Qazgıdromet" RMK ókilderine silteme jasap.
"Sibirdiń soltústik aýdandary ústinde qalyptasqan sýyq jáne aýqymdy antısıklonnyń saldarynan Qazaqstanda naǵyz qysqy aýa raıy ornady. Aldaǵy demalys kúnderi respýblıkada aıaz arktıkalyq aýanyń jańa úlesteriniń kelýimen kúsheıetin bolady. Soltústik, ortalyq jáne shyǵys oblystarda túngi temperatýra 30-35 gradýs, keı jerlerde 40 gradýs aıaz bolsa, batysta 20-28 gradýs aıaz kútilýde", - dep habarlady mamandar.
Sondaı-aq, sınoptıkterdiń málimetinshe, elimizdiń ońtústigi men ońtústik-shyǵysynda da sýyq, qar jaýý, keı jerlerde óte kúshti shyǵystyq jel, boran kútilýde. Aýa temperatýrasy aldaǵy úsh táýlikte Qazaqstannyń barlyq aýmaǵynda klımattyq mánnen 13-20 gradýsqa tómen bolady.