Mańǵystaý oblysynyń turǵyny XII-XIII ǵasyrǵa jatatyn altyn teńgeler kómbesin tapty, dep habarlaıdy lada.kz.
Ǵalym Pavel Petrovtyń aıtýynsha, bul qazyna Anýshtegınıd Ala ad-Dın Tekesh pen Muhammed ıbn Tekesh horezmshahtar áýletine tıesili bolýy múmkin. Al arheolog Andreı Astafev bul aqshanyń soǵylǵan orny Mańǵyshlaq qalasy bolýy yqtımal degen boljam jasap otyr.
Mańǵystaýdyń ejelgi qonystaryn zertteý Azııa elderi men Shyǵys Eýropa arasyn jalǵaǵan Uly Jibek jolynyń soltústik tarmaǵyn zertteýdiń basty quraýshy ǵylymı taqyryby bolyp tabylady. Alaıda, Andreı Astafevtiń aıtýynsha, bul taqyrypqa tarıhshylar men arheologtar asa mán bere qoımaǵan. Pavel Petrovtyń saraptamalyq qorytyndysy boıynsha, álemniń esh mýzeıinde mundaı bir orynnan tabylǵan monetalar kesheni joq. Atalǵan keshendi ǵalym Qazaqstannyń ulttyq baılyǵy dep atady. Tekesh hannyń bıligi tusynda Horezm Ortalyq Azııanyń qýatty memleketteriniń biri boldy. Onyń shekarasy Aral teńizinen Parsy buǵazyna deıin, shyǵysynda Pamırden Iran taýly ólkesine deıin sozyldy. Tekesh bılik etken jyldary Horezm aýmaǵy eki ese ulǵaıǵan. Odan bólek, Tekesh negizin qalaǵan kitaphana týraly da málimetter saqtalǵan. Tekesh horezmshah qaıtys bolǵan soń, taqqa onyń kishi uly Ala ad-Dın Muhammed otyryp, Horezm aýmaǵyn odan ári keńeıtti.