«Astana» komandasynyń oıynshylary men bapkerler quramy jattyǵý jumystary aldynda qalamyzdyń az qamtylǵan jáne kópbalaly otbasynan shyqqan №13, №57 mektep oqýshylarymen kezdesip, áńgimelesti. Kezdesý barysynda balalar «Astana» komandasy ujymynan qysqy maýsymǵa arnalǵan kıimderdi syılyqqa alyp, ózderiniń súıikti oıynshylarymen estelik sýretterge tústi, dep habarlaıdy fýtbol klýbynyń baspasóz qyzmeti.
"Búgin biz úshin erekshe kún. Qalamyzdyń №13 jáne 57-shi mektepterinde oqıtyn jas dostarmen kezdesýdi burynnan oılastyryp kelemiz. Bul balalar fýtbol oınaýdy qanshalyqty jaqsy kóretinin, ózderi komanda qurap, ártúrli týrnırler men jarystarǵa qatysyp júrgenin bilemiz. Barsha otandastarymyz úshin úlken mereke – Tuńǵysh Prezıdent kúni qarsańynda sizdermen kezdesý uıymdastyrýdy uıǵardyq. Bárimizge belgili, 1 jeltoqsan – Táýelsiz Qazaqstandaǵy tuńǵysh jalpyxalyqtyq prezıdenttik saılaý kúni. 1991 jylǵy 1 jeltoqsanda Qazaqstannyń taǵdyry talqy ústinde turǵan kezde, alǵash ret prezıdenttik saılaý ótip, onda Nursultan Ábishuly Nazarbaev Qazaqstannyń tuńǵysh Prezıdenti bolyp saılanǵan edi. Elimizdiń sodan bergi damý tarıxy Elbasy esimimen tikeleı baılanysty. Al «Astana» fýtbol klýby Prezıdent kásibı fýtbol klýbynyń quramyna enedi. Iаǵnı, biz úlken sporttyq januıa múshelerimiz. Ult kóshbasshysy Nursultan Ábishuly óz joldaýlarynda memlekettik uıymdar áleýmettik jaýapkershilikti sezinýi tıis ekendigin, al orta býyn men elimizdiń qaltaly azamattary az qamtylǵan, kópbalaly otbasylarǵa qamqorlyq jasaýy qajet ekenin únemi aıtyp keledi, óıtkeni, otbasy – memleket tiregi. Bizdiń el árqashan xalyqtyń qorǵaýsyz qatparlaryna qamqorlyq jasap, áleýmettik kómek kórsetip keledi, biraq, ókinishke qaraı, bul árqashan da jetkilikti bola bermeıdi. Biz muqtajdyǵy barlarǵa qolymyzdan kelgenshe kómek kórsetý arqyly memlekettiń áleýmettik baǵyttaǵy jumystaryna atsalysýǵa bel býdyq" - deıdi «Astana» fýtbol klýbynyń atqarýshy dırektory Qaısar Bekenov.