QR premer-mınıstri Baqytjan Saǵyntaev QR ishki ister mınıstri Qalmuhanbet Qasymovtyń «Qazaqstan Respýblıkasynyń keıbir zańnamalyq aktilerine ekstremızm men terrorızmge qarsy is-qımyl máseleleri boıynsha ózgerister men tolyqtyrýlar engizý týraly» QR Zańyn iske asyrý barysy jónindegi esebin tyńdady. Bul týraly primeminister.kz saıtynda habarlandy.
Mınıstrliktiń halyq arasynda túsindirý jumystary boıynsha qabyldaǵan sharalary, sonymen qatar azamattardyń ýaqytsha kelgen jerinde tirkeý máseleleri talqylandy.
Málim bolǵandaı, turǵylyqty jeri boıynsha tirkeý talaptary jalpy álemdik tájirıbe bolyp tabylady. Qazaqstanda halyqty turǵylyqty jeri men ýaqytsha ómir súrý orny boıynsha esepke alý zańnamada qarastyrylǵan. Sonymen qatar, zańda turǵyn úı ıesinen úıinde turatyn adamdardy tirkeýmen qamtamasyz etý mindeti bastapqyda bolmaǵan.
Eske sala keteıik, bıylǵy 7 qańtarda, «Qazaqstan Respýblıkasynyń keıbir zańnamalyq aktilerine ekstremızm men terrorızmge qarsy is-qımyl máseleleri boıynsha ózgerister men tolyqtyrýlar engizý týraly» QR Zańyna sáıkes, turǵyn úıdi jalǵa berýshiler menshik ıesine tıesili turǵyn úılerde jeke tulǵalarǵa tirkeýsiz ómir súrýge jol bergeni úshin ákimshilik jaýapkershilikke tartylatyn bolady. Zań qoǵamdyq qaýipsizdikpen qamtamasyz etý men ekstremızm men terrorızmge qarsy is-qımyl sharalaryn kúsheıtýge baǵyttalǵan.