Oblystyq halyq shyǵarmashylyǵy úıiniń 55 jyldyǵyna arnalǵan «Eńbek pen óner egiz» atty kásiporyndar men mekemeler kórkemónerpazdarynyń dástúrli oblystyq baıqaýy ótkizildi.
Jyl saıyn bul baıqaýdyń mazmuny ózgertilip otyrady. Bul jolǵy baıqaý kásiporyndar men mekemeler kórkemónerpazdarynyń arasynda uıymdastyryldy. Baıqaýǵa qatysýǵa 7 kásiporyn men mekemeden ótinim túsken eken.
Baıqaýdyń shartyna saı qatysýshy komandalar 10 mınýttyń ishinde ózderiniń baǵdarlamasyn usyndy. Sonymen qatar, baıqaý aıasynda arnaıy kórme uıymdastyryldy. Kórmege el tarıhy men mádenıeti taqyrybynda ártúrli qaǵazdan, aǵashtan jasalǵan buıymdar, kıizden tigilgen, oıýmen órnektelgen ulttyq kıimder jáne basqa týyndylar qoıyldy. Bul kórme kópshilik kóńilinen shyǵyp, kelýshilerdi ulttyq qolónerimizben tanystyrdy. Baıqaýda komandalar kórermender men qazylar alqasyna mýzykalyq jáne shyǵarmashylyq kompozısııalaryn usyndy. Jarqynaı Kúzembaeva jetekshilik etetin Mártók aýdandyq oqýshylar úıi birinshi oryndy jeńip aldy. Baıǵanın aýdanynyń «Aqbulaq» komandasy ekinshi oryndy ıelendi. Jetekshisi – Jadyra Ermekbaı.Úshinshi oryn Baǵdat Qusaıynova bastap shyqqan Oıyl aýdanynyń «Baldyrǵan» balabaqshasynyń komandasyna buıyrdy. Baıqaý jeńimpazdary men qatysýshy eńbek ujymdaryna dıplomdar men aqshalaı syılyqtar tapsyryldy.
Satybaldy SÁÝIRBAI,
«Egemen Qazaqstan»
AQTО́BE