Parlament Májilisiniń depýtattary Abzal Eralıev, Baqytbek Smaǵul, Gennadıı Shıpovskıh, Balaıym Kesebaeva jáne Álııa Saparova Qyzylorda oblysynda jumys saparymen júr.
«Nur Otan» partııasy oblystyq fılıalyndaǵy brıfıng barysynda depýtat Baqytbek Smaǵul elimizdiń jetistigine súbeli úles qosyp otyrǵan Syr eliniń aıtarlyqtaı tabystaryn atap ótti. Balaıym Kesebaeva altynshy saılanǵan Májilistiń ekinshi sessııasynda 66 zań jobasy qaralyp, onyń 34-i maquldanyp, Senatqa jiberilgenin málimdedi. Sondaı-aq, Abzal Eralıev jumys saparynyń negizi Parlament palatalarynyń birlesken otyrysynda qabyldanǵan Qazaqstan Respýblıkasy Táýelsizdiginiń 25 jyldyǵyna arnalǵan Deklarasııa men elimizdiń aldaǵy kúngi damý jolyn aıqyndaıtyn 5 ınstıtýttyq reforma jáne osy reformany júzege asyrýǵa septesetin «100 naqty qadam» Ult jospary týraly túsindirme jumystaryn júrgizý bolyp tabylatynyn aıtty.
Aıta ketý kerek, depýtattardyń saılaýshylarmen kezdesýi qańtar aıynyń 13-ine deıin jalǵasyp, bul úderis oblys, aýdan ortalyqtarymen qatar, shaǵyn qalalar, aýyldar men shalǵaı eldi mekenderdi de qamtıtyn bolady. Májilis depýtattarynyń osy ýaqyt aralyǵynda azamattardy qabyldap, óndiristik jáne áleýmettik-mádenı nysandarda bolýy josparlanǵan.
Erjan BAITILES,
«Egemen Qazaqstan»
Qyzylorda oblysy