Belgili tarıhshy Ermuhan Bekmahanovtyń qıyn taǵdyryn beıneleýge qurylǵan Satybaldy Narymbetovtiń «Amanaty» men Doshan Joljaqsynov túsirgen «Qunanbaı» fılmderi qańtardyń 12-29 aralyǵynda Bolgarııada ótetin IH halyqaralyq MENAR kınofestıvaline qatysady. Sh.Aımanov atyndaǵy «Qazaqfılm» kınostýdııasynyń ónimderi kópshilikke «Fokýs» baǵdarlamasy aıasynda kórsetiledi.
Kenesary hannyń azattyq qozǵalysy týraly tarıhı monografııa jazyp, sol úshin qýdalanǵan kórnekti ǵalymnyń taǵdyry jaıynda týyndy kórermenderdiń de, kınosynshylardyń da kóńilinen shyqqany esimizde. «Balalyq shaǵymnyń Don Kıhoty» (1978 j), «Kózimniń qarasy» (1994 j), «Qyzjylaǵan» (2002 j), «Mustafa Shoqaı»
(2008 j) syndy fılmderimen rejısserlik qarymyn dáleldegen S.Narymbetovtiń «Amanaty» «Oskar» júldesiniń «Eń úzdik shet tilindegi fılm» tańdalymyna usynylǵan bolatyn.
Al Doshan Joljaqsynovtyń tarıhı tulǵasy qaıshylyqty pikirlerden daralana almaı kele jatqan dala kemeńgeri Qunanbaıdyń ómiri jaıly baıandaıtyn «Qunanbaı» fılmi kórermenge jol tartqaly birqatar alaman báıgelerde baq synap úlgerdi. Byltyr alǵashqy ulttyq «Tulpar» kınobáıgesinde top jaryp, fılmniń avtorlary úzdik dep tanyldy. 2016 jyldyń qyrkúıeginde atalmysh kartına XII Qazan halyqaralyq musylman kınosy festıvaliniń konkýrstyq baǵdarlamasynda kórsetilip, Ýfada ótken III halyqaralyq «Kúmis Aqbozat» ulttyq jáne etnıkalyq kınofestıvalinde Ámir Ábdirazaqov atyndaǵy «Ulttyq rýh» júldesin ıelengen.
Sofııadaǵy MENAR halyqaralyq kınofestıvali Balqan túbegindegi eń iri mádenı oqıǵalardyń biri bolyp sanalady. Festıval jyl saıyn kórermen qaýymdy musylman áleminiń dástúri men mádenıetin pash etetin fılmdermen tanystyrady. Festıvaldyń baǵdarlamasy aıasynda Qıyr Shyǵysta, Ortalyq Azııa elderi jáne Soltústik Afrıkada túsirilgen úzdik kórkem, derekti jáne qysqametrajdy fılmder de kórermen nazaryna usynylmaq. Qazaqstandyq kartınalar 14 qańtar kúni «Eýrosınema» kınoteatrynda aǵylshyn tilindegi sýbtıtrlarmen kórsetiletin bolady.
Aıgúl AHANBAIQYZY,
«Egemen Qazaqstan»
ALMATY