Qarap otyrsaq, aıaqtalǵan jylda telekommýnıkasııa naryǵyndaǵy eleýli oqıǵanyń biri – uzaq jyl ustaǵan nómirińdi aýystyrmaı-aq operator almastyrý boldy. Demek, nómir qalady, al «mobıldik quldyqtan» qutylýǵa bolady. Uıaly baılanys salasyna mundaı qyzmettiń engizilýi naryqtaǵy básekeni kúsheıtip, barlyq mobıldik operatorlardy abonentterine tıimdi tarıfter usynýǵa májbúrledi.
Al endi osynyń naqty nátıjesi qandaı boldy desek, 2016 jyly 200 myńnan astam qazaqstandyq «mobıldi quldyqtan» qutylǵan. Iаǵnı, ótken jylǵy 1 qańtardan bastap 31 jeltoqsanǵa deıin MobileNumberPortability (operatorlardyń arasynda nómirlerdi kóshirý) qyzmeti qoljetimdi bolǵannan keıin, 203 719 abonent osy qyzmetti paıdalanǵan.
«Kóshirilgen nómirlerdiń ortalyq derek qory» MTQ respýblıkalyq memlekettik kásipornynan alynǵan málimetter boıynsha, 2016 jyly MNP ótýleri boıynsha abonentterdiń taza kelýi Tele2 operatorynda anyq baıqalady. Bul baılanysqa kóshken abonentter sany – 37 015. Al Altel-ge kelgeni 2 551 abonent. Osy aralyqta Beeline kompanııasynan 5 997 abonent, Kcell operatorynan Activ saýda belgisin qosa alǵanda 62 227 adam ketken. Sol sııaqty shamamen 28 myń abonent óziniń burynǵy operatoryna oralýdy qosh kóripti.
О́sý statıstıkasyna sáıkes, naryqta baǵalary asa tómen jáne 4G ınternetimen jaqsyraq qamtylǵan operatorlar úlken suranysqa ıe bolǵanyn aıta ketýge bolady.
Aınash ESALI,
«Egemen Qazaqstan»
ALMATY