Tárbıesiz bilim tul

Jıyrma bes jyl aralyǵynda táýelsizdik tuǵyryn berik ornyqtyrǵan Qazaqstan bilim saıasatyna árdaıym basym baǵyt berip keledi. Elbasy jyl saıynǵy dástúrli Joldaýynda da bilim salasyna qatysty naqty tapsyrmalar beredi. О́ıtkeni erteńgi kúnniń búgingiden nurly bolýyna yqpal etip, adam balasyn alǵa jeteleıtin qudyretti kúsh – bilim. «Zamanaýı álemde eldiń qýaty aldymen, azamattarynyń bilimimen ólshenedi. Tereń bilim – táýelsizdigimizdiń  tiregi, aqyl-oı azattyǵymyzdyń aldaspany», degen Memleket basshysynyń sózi ómir boıy ózekti bolyp qala bermek. 1991 jyly elimiz egemen­di­gin alyp, bodandyqtan bosap, azattyqqa qol jetkizip, Qazaqstan degen atpen búkil álemge alǵash qadam basqan jy­ly men de eńbek jolymdy bas­tadym. Halyq múddesi men qo­ǵamnyń talabyna saı 25 jyl pe­dagogıkalyq qyzmet atqaryp ke­lemin. Bul, árıne, naǵyz jalyndy jastyń jasymen para-par ýaqyt. Degenmen, ózimdi tú­letip, úlken ómirge ushyrǵan №188 orta mektepke bastaýysh synyp muǵalimi bolyp kirgenim keshe ǵana sııaqty edi. Eńbek – adamdy árqashan alǵa jeteleıdi. Talmaı izdený men úlken eńbektiń arqasynda Jalaǵash aýdandyq bilim bó­li­miniń ádiskeri, №114, №32 mek­tepterinde dırektordyń oqý isi jónindegi orynbasary qyz­metin atqardym.  2005 jyldan beri M.Mámetova atyn­daǵy gý­ma­nıtarlyq kol­ledjinde pedago­gı­ka páninen sabaq beremin. Jo­ǵary sanatty oqytýshy, pedago­gıka ma­gıstrimin. Bizdiń kol­ledj – kásiptik bi­­li­m­­niń ne­gizin qa­laı­tyn, elimizge qa­jet­­ti­ ma­mandardy daıar­laı­tyn be­deldi oqý oryn­darynyń biri. Meniń paıymdaýymsha, oqý­shy men muǵalim áre­ket­­te­ri­niń  maq­saty mazmuny ózara úı­lesip, ta­bys­qa jetý, tutas bir júıege aı­nalý degendi bildiredi.  Bar maq­satym – balalarǵa pedago­gıkadan sapaly bilim, jan-jaq­ty tárbıe berý. «Adamǵa eń birinshi bilim emes, tárbıe berý kerek. Tárbıesiz berilgen bilim – adamzattyń qas jaýy. Ol keleshekte onyń ómirine apat ákeledi», dep Ábý Nasyr Ál Farabı aıtqan naqyl sózdi ózimniń ustazdyq jumysymda únemi nazarda ustaımyn. Qazirgi qubylmaly zamanda tárbıege basty nazardy otbasynda da, oqý ornynda da aýdarý kerek. Ustaz balanyń ekinshi ata-ana­sy, bolashaqqa jón silter aqyl­shysy, onyń meıirimge toly jú­regi shákirt boıyndaǵy talaı aǵat­tyqty keshire biledi, bilimi men aqyl-oıy­nyń qýaty talaı ten­tekti jýasytyp, tár­tip­ke baýlyp, eseı­tip, er jetkizgen. «Qa­zaq mektepteri – qa­zaq­­tarǵa bilim berý­diń bas­ty quraly. Biz­diń bar­lyq úmitimiz, qazaq halqynyń keleshegi osy mektepterde. Sondyqtan mektepterde jaqsy bilim beriletin bolsyn. Ǵylymmen qarýlanǵan, ár nársege durys kózqarasy bar adamdar qazaq arasynda­ kóbeıse, ol búkil halyqqa áser­ ete alady», dep kezinde Y.Altynsarın aıtqan. Mine, osy aıtylǵan  sóz bárimizdi oı­lan­tsa kerek. Oqytýshy eńbeginiń shy­ńy oqýshylar jetistiginde ekeni belgili. Osy jyldar aralyǵynda respýblıkalyq «Jas ǵalym» oqýshylar men stýdentterdiń ǵylymı ju­mys­tary saıysynda shákirtim Gúlzıra Batysheva «Ǵylymǵa degen qushtarlyǵy» baǵyty boıynsha ǵylymı jobasymen qatysyp, III orynǵa ıe bol­dy. «Jas zertteýshi» at­ty res­pýblıkalyq zııatkerlik týr­­­nırinde Sezim Bısenbaı «Ǵy­­lymǵa alǵashqy qadam» ba­ǵy­ty boıynsha II oryn alsa, «Bolashaq mamannyń kásibı qu­zy­rettiligin qalyptastyrý» atty oblystyq ǵylymı joba baı­qaýynda Serik Nurlybek jeńimpazdar qatarynan kó­rin­di. Shákirtiniń bul sııaqty bıik beles­ten kóringeni – ustaz eń­be­­giniń esh ketpegeni. Shyǵar­ma­shylyq qabilet ár balanyń ta­bıǵatynda bar. Bizdiń mindet – oqýshy boıyn­daǵy jasyrynyp jatqan múmkindikti ashý. Gúljaına ÁBIEVA, M. Mámetova atyndaǵy Qyzylorda gýmanıtarlyq kolledjiniń pedagogıka páni oqytýshysy