Qaraǵandy oblysyndaǵy Shahan poselkesinde oryn alǵan apat búkil qazaqstandyqtardyń qabyrǵasyn qaıystyrdy.
Qara jamylǵan otandastarǵa qolushyn berýdi qostanaılyq memlekettik qyzmetkerler paryz dep bilipti. Shahandyqtarǵa kómek úshin uıymdastyrylǵan aksııaǵa jergilikti atqarý organdarynyń – barlyq deńgeıdegi ákimdik, oblystyq basqarmalar men vedomstvolyq mekemeler qyzmetkerleri belsendi atsalysty. Sóıtip, «Shahtınsk qalasyndaǵy Shahan poselkesinde qalyptasqan tótenshe jaǵdaıdan zardap shekkenderge kómek qory» qoryna 11 mıllıon teńge aýdaryldy.
Zardaby aýyr mundaı oqıǵalardyń sabaǵy bolýy kerek. Sol úshin de oblys ákimi Arhımed Muhambetov óńirdegi barlyq jylý kózderine muqııat tekserý júrgizýdi tapsyrdy.
– Kúzde jylý berer aldynda jylý qazandyqtarynyń barlyǵy da tekseristen ótkizilgen, biraq turǵyndar qaýipsizdigi úshin qosymsha sharalar júrgizip otyrǵannyń artyqtyǵy joq, – dedi A.Muhambetov.
Energetıka jáne turǵyn úı-kommýnaldyq sharýashylyǵy basqarmasy mamandarynyń aıtýynsha, jaqyn kúnderi oblystaǵy jylý jelilerine, turǵyn úılerdegi, áleýmettik nysandardaǵy qazandyqtarǵa júrgizilgen tekserister aıaqtalady. Baıqalǵan kem-ketikter jóndelmek.
Názıra JÁRIMBETOVA,
«Egemen Qazaqstan»
QOSTANAI