Astanada Ilınka aýdanynda ornalasqan «jasyl beldeýdiń» soqpaq joldar trassasynyń bazasynda 28-shi Dúnıejúzilik qysqy ýnıversıada aıasynda «Qańtarlyq sprınt» shańǵy jarysy ótti, dep habarlaıdy qala ákimdiginiń saıty.
Sharaǵa 100-den astam adam qatysty. Jarystyń saltanatty ashylý rásiminde dástúrli sportshylar sherýi ótti. Uıymdastyrýshylar men tóreshiler quramyna iri sporttyq-buqaralyq sharalardy ótkizý boıynsha tájirıbesi mol jetekshi sportshylar kirdi. Solardyń biri – shańǵy jarysynan QR eńbek sińirgen jattyqtyrýshysy, joǵary sanattaǵy tóreshi Starostın Iýrıı Mıhaılovıch.
«Bul sharanyń ereksheligi – Ýnıversıada qarsańynda ótkizilip jatqanynda. Jarysqa qatysýshylar 9 jas sanatynda óner kórsetedi, sonyń ishinde uldar men qyzdar, erler men áıelder, 40-tan asqan ardagerler de bar. Bul dástúrli shara, buryn «Burqasyn» dep atalǵan. Búginde jańa oryn – velojoldy ıgerip jatyrmyz. Qysta arnaıy shańǵy joly daıyndalady. Jyl saıyn turǵyndardyń qyzyǵýshylyǵy artyp keledi. Shańǵy jarysyn odan ári damytýǵa bolady, salaýatty ómir saltyn dáriptep, qala turǵyndary men qonaqtaryna laıyqty demalys usynamyz», – deıdi Iýrıı Starostın.
«Qańtarlyq sprınt» baǵdarlamasynda qatysýshylar jas sanatyna qaraı túrli qashyqtyqty baǵyndyrady. Jarys qorytyndysy boıynsha jeńimpazdar baǵaly syılyqtarmen marapattaldy.