О́rkenıetti elderde birinshi kezekte adam densaýlyǵyna, ómir súrý sapasyna erekshe mán beriledi. Ozyq ınnovasııalyq jobalardy óndiriske keńinen engizýdiń arqasynda hlorlanbaǵan tirshilik kózin paıdalaný tájirıbesiniń keńinen qanat jaıýy da sondyqtan. Endi osy tektes tehnologııa elimiz boıynsha alǵash ret M.Qozybaev atyndaǵy Soltústik Qazaqstan memlekettik ýnıversıtetinde qolǵa alynǵaly otyr.
Irgeli oqý ornynda «Taza ekologııalyq sý» ınnovasııalyq baǵdarlamasynyń tusaýkeser rásimi ótip, oǵan qatysqan ekologtar, professor-oqytýshylyq quram, tabıǵat janashyrlary Reseıdiń Tom polıtehnıkalyq ýnıversıtetiniń ǵalymdary usynǵan baǵdarlamanyń mańyzdylyǵy men tıimdiligin atap ótti. Jergilikti jerdegi joba jetekshisi Irına Golodovanyń aıtýynsha, ony júzege asyrýǵa 150 mıllıon teńge bólinip, tıisti qujattar resimdeýge joldanypty. «Qyzyljar sý» JShS, Qazsýshar respýblıkalyq memlekettik kásiporny «Esil sý» fılıaly sekildi irgeli kásiporyndar sý tazartqysh quraldardy paıdalanýǵa múddelilik tanytyp otyr.
О́ńir turǵyndaryn aýyz sýmen qamtamasyz etetin jalǵyz tirshilik kúretamyry – Esil ózeniniń barǵan saıyn laılanyp bara jatqany, zııandy zattar kóp tastalatyny belgili. Ásirese, túrli ıondar, aýyr metaldar, qyshqyldar az kezdespeıdi. Qar erip, ylǵal kóp bolǵan ýaqyttarda sýdy tazartatyn koagýlıanttardy qoldaný mólsheri kúrt ulǵaıady. Munyń ózi adam densaýlyǵyna keri áserin tıgizeri sózsiz. Al, bul prosess «Aerozon» sý tazartqysh kesheni arqyly atqarylsa, sýdy hlorlamaı-aq zııandy zattardan júz paıyz aryltýǵa bolady.
Sýdyń sapasyn jaqsartatyn qurylǵylardy jasaýmen Kırov atyndaǵy zaýyt aınalysady.
О́mir ESQALI,
«Egemen Qazaqstan»
Soltústik Qazaqstan oblysy