Búgin elorda ákimdiginiń bastamasymen qala turǵyndary úshin «Astana» konsert zalynda ashyq esik kúni ótip, oǵan qalanyń barlyq basqarmalarynyń basshylary men ókilderi qatysty, dep habarlady elorda ákimdiginiń baspasóz qyzmeti.
«Belsendi azamat» aksııasynyń sheńberinde «О́z qalańdy damytýǵa úlesińdi qos» uranymen ótken sharaǵa elorda turǵyndary keldi. Azamattar suraqtaryn qoıyp, mamandardan keńes aldy jáne elordada ómir súrý sapasyn jaqsartý boıynsha óz usynystaryn jetkizdi.
«Biz úshin sheshim qabyldaǵanda nemese belgili bir jumystarymyzdy josparlaǵan kezde qala turǵyndarynyń pikirlerin eskerý mańyzdy. Sondyqtan bul shara jemisti ótedi dep oılaımyn, turǵyndar tańerteńnen beri belsendilik tanytýda, sol sebepti azamattardan túsken suraqtardy búgingi kúnniń qorytyndysy boıynsha júıelendirip, aldaǵy ýaqytqa jumys josparyn quratyn bolamyz»,- dep atap kórsetti Astana qalasynyń ishki saıasat basqarmasynyń basshysy Erlan Kanalımov.
Shara barysynda qala turǵyndary óz suraqtaryn aýyzsha jáne jazbasha túrde qoıa aldy. Qalalyq basqarmalardyń basshylary olardyń suraqtaryna jaýap berip, keńes aıtyp qana qoımaı, ótken jyldyń qorytyndysyn shyǵardy. Astanalyqtar negizinen turǵyn úı qurylysynyń kezegi, jumysqa turý, PIK qyzmeti, kólik qyzmeti jáne densaýlyq saqtaý salasy boıynsha suraqtar qoıdy.
«Bizge adamdar kóptegen máselelerin aıtyp keledi, jaqynda jumystan shyǵyp qalǵan jumyssyzdar kóp, olar jumys izdep keledi nemese mamandyǵyn aýystyrýdy qalaıdy. Biz barlyq máselelerdi sheshýge tyrysamyz, osy jerde sheshilmese, basqarmada jeke jáne zańdy tulǵalardyń ótinishterin qaraý tártibimen sheshetin bolamyz», - dep málim etti Astana qalasynyń jumyspen qamtý, eńbek jáne áleýmettik qorǵaý basqarmasy Qaýipsizdikti baqylaý jáne eńbek qorǵaý bóliminiń basshysy Nurlan Isekeev.
Bir aıta keterligi, elordalyqtarǵa basqarmalardyń basshylaryna suraqtaryn tikeleı qoıýǵa múmkindik beretin «Belsendi azamat» aksııasy eki jyldan beri ótkizilip keledi. Shara jylyna eki ret - qańtar jáne aqpan aılarynda uıymdastyrylady. Kelesi mundaı shara 8 aqpanǵa josparlanǵan.