Sankt-Peterbýrg kásipodaqtardyń gýmanıtarlyq ýnıversıtetiniń Almaty fılıalynda «Qoǵamdyq jańǵyrýlar dáýirindegi ekonomıka, quqyq, mádenıet» dep atalatyn dástúrli halyqaralyq ǵylymı-tájirıbelik máslıhat bolyp ótti.
Máslıhat jumysyna Sankt-Peterbýrg kásipodaqtardyń gýmanıtarlyq ýnıversıteti fılosofııa jáne mádenıettaný kafedrasynyń professory, pedagogıka ǵylymdarynyń doktory, mádenıettaný doktory, Reseı Federasııasy ǵylymynyń eńbek sińirgen qaıratkeri A.Markov, Reseı Federasııasy Bas konsýldyǵynyń Almaty qalasyndaǵy konsýly, Qazaqstan Respýblıkasyndaǵy Reseı yntymaqtastyǵynyń ókildigi basshysynyń orynbasary, dosent, fılosofııa ǵylymdarynyń kandıdaty I.Pereverzeva, Qazaqstan Respýblıkasy Konstıtýsııalyq Keńesiniń múshesi, professor V.Malınovskıı, Qazaqstan men Reseıdiń, taıaý shet elderdiń birqatar belgili ǵalymdary qatysty.
Jınalǵandarǵa Sankt-Peterbýrg kásipodaqtardyń gýmanıtarlyq ýnıversıtetiniń Almaty fılıalynyń dırektory T.Batalova quttyqtaý sózben shyqty. Ol qoǵamdyq damýdyń barlyq áleýmettik-ekonomıkalyq úderisterine júıe quraýshy faktor retinde orasan zor yqpal etetin mádenıettiń erekshe mańyzyna konferensııaǵa qatysýshylardyń nazaryn aýdardy.
Osy turǵydan alǵanda, elimizdi ári qaraı damytý baǵytyndaǵy jumystarda Qazaqstan Respýblıkasynyń Prezıdenti Nursultan Nazarbaevtyń ústimizdegi jyldyń 24 qańtaryndaǵy Úndeýiniń orasan zor mańyzy bar. Onyń erejeleri áleýmettanýshylardyń, zańgerlerdiń, ekonomısterdiń keshendi túrdegi tereń taldaýyn talap etedi. Sondyqtan, atalǵan máslıhat aıasynda bul mindet barlyq taqyryptyq seksııalardyń aldyna qoıylyp otyr. Osyǵan oraı, máslıhattyń plenarlyq májilisi Qazaqstan Respýblıkasy Konstıtýsııalyq Keńesiniń múshesi, zań ǵylymdarynyń doktory V.Malınovskııdiń baıandamasynan bastaldy.
О́ziniń «Memlekettik bılik tarmaqtarynyń arasynda ókilettikterdi qaıta bólý: qısyn, júıelilik, ǵylymılyq jáne halyqtyq» dep atalatyn baıandamasynda V.Malınovskıı ókilettikterdi qaıta bólý qoǵamnyń qazirgi damý kezeńine sáıkes keletinine jáne Qazaqstannyń demokratııalyq quqyqtyq memleket retindegi strategııasyn júzege asyrýdyń kezeńi bolyp tabylatynyna nazar aýdardy.
Memlekettik bıliktiń birligi men ony bólý qazirgi zamanǵy memlekettiń halyqtyǵy men tıimdiligin qamtamasyz etetin bolýy tıis. Ol ótken ǵasyrdyń 90-shy jyldarynda jáne Qazaqstan Respýblıkasynyń 1995 jylǵy Konstıtýsııasynyń qyzmetinde kórinis tapqan memlekettik pishinniń tájirıbesine negizdelip otyr. 1998 jáne 2007 jyldardaǵy konstıtýsııalyq reformalar Parlamenttiń ókilettigin jáne Úkimettiń jaýapkershiligin arttyrýǵa baǵyttalǵan. Qazirgi kezeń bul strategııanyń durystyǵyn aıǵaqtap berip otyr.
Zań jobasyn búkilhalyqtyq talqylaý barsha qazaqstandyqty basqarýdyń prezıdenttik pishinin ári qaraı yryqtandyrýǵa qosýǵa oń yqpal etetin bolady.
Talqylaý jumysyna belgili qazaqstandyq ǵalymdar: zań ǵylymdarynyń doktory, professor S.Álibekov, zań ǵylymdarynyń doktory, professor E.Dúısenov, zań ǵylymdarynyń doktory, professor E.Túzelbaev, zań ǵylymdarynyń doktory, professor O.Verbovaıa, zań ǵylymdarynyń doktory, professor A.Áýbákirova, zań ǵylymdarynyń kandıdaty, dosent O.Gromova (Sankt-Peterbýrg) jáne taǵy basqalar qatysqan ıýrısprýdensııa seksııasynda jalǵasty. Úndeýde qozǵalǵan sheshýshi problemalarǵa baılanysty qyzyqty pikir almasýlar júrip, Qazaqstan Respýblıkasy Konstıtýsııasyna usynylyp otyrǵan ózgerister saralandy jáne josparlanyp otyrǵan bizdiń elimizdegi memlekettik bılik tarmaqtarynyń arasyndaǵy ókilettikterdi qaıta bólý turǵysynan kelgende Qazaqstannyń konstıtýsııalyq jáne salalyq zańnamalaryn jetildirý boıynsha qyzyqty usynystar kóldeneń tartyldy.
Qazaqstan Respýblıkasynyń Konstıtýsııasyna ózgerister engizý týraly jeke usynystar ǵalymdar tarapynan úlken pikirtalas týǵyzdy.
Aıgúl AHANBAIQYZY,
«Egemen Qazaqstan»
ALMATY