Ońtústik Qazaqstan oblysynyń ákimi Janseıit Túımebaev Vengrııanyń Syrtqy ekonomıkalyq baılanystar jáne Syrtqy ister mınıstrliginiń Memlekettik hatshysy Mıklosh Ishtvandy jáne Vengrııanyń Qazaqstandaǵy Tótenshe jáne ókiletti elshisi Andrash Baranımen kezdesti. Basqosýda taraptar ekijaqty ózara tıimdi yntymaqtastyq maqsatyndaǵy birlesken jobalardyń júzege asý barysyn talqylady, dep habarlady OQO ákimdiginiń baspasóz qyzmeti.
«Tarıhqa kóz júgirtsek, eki ultta keń dalada tirshilik etken. Sondyqtan bolar vengr tilinde túrki sózderi kóp kezdesedi. Osynyń ózi bizdiń halyqtardyń ejelden tatý qarym-qatynysta bolǵandyǵyn ańǵartady. Sondyqtan budan bylaı Otústik Qazaqstan oblysy men Vengrııa eliniń arasynda saýda ekonomıkalyq, mádenı, gýmanıtarlyq baılanystar nyǵaıa túsetinine senimdimin», - dedi Janseıit Qanseıituly.
Agrarlyq salaǵa beıim Ońtústik Qazaqstan oblysy – vengrlik ınvestorlardyń qyzyǵýshylyǵyn týdyryp otyr. Aımaq basshysy elshilik ókilderine osy artyqshylyqtar týraly jan-jaqty baıandap berdi. Kezdesýde sóz alǵan Vengrııanyń Qazaqstandaǵy Tótenshe jáne ókiletti elshisi Andrash Baranı eki el arasyndaǵy saıası, ekonomıkalyq, áleýmettik, mádenı salada birlesken jobalardyń júzege asyp jatqanyn jetkizdi.
«Búginde vengrler Qazaqstanǵa vıza rásimdemeı-aq kelýine múmkindik bar. Bul óz kezeginde kásipkerlik salasyn damytýǵa, iskerlik qarym-qatynasty nyǵaıtýǵa zor múmkindik beredi»,-dedi elshi.
Keleli kezdesýden keıin eki taraptyń qatysýymen Vengrııanyń Shymkent qalasyndaǵy konsýldyǵynyń ashylý saltanaty ótti. Jańadan ashylǵan ókildik aldaǵy ýaqytta eki memleket arasyndaǵy strategııalyq áriptestikti nyǵaıtyp, taýar aınalymy ulǵaıǵaıyp, ınvestısııa tartýǵa da septigin tıgizbek. Vengrııanyń Qazaqstan Respýblıkasyndaǵy Qurmetti konsýly bolyp «OTAU Group» kompanııasynyń prezıdenti, belgili mesenat Qaırat Moldaseıitov taǵaıyndaldy.
Vengrııanyń Syrtqy ekonomıkalyq baılanystar jáne Syrtqy ister mınıstrliginiń Memlekettik hatshysy Mıklosh Ishtvan myrza Qaırat Moldaseıitovke Qurmetti konsýl qyzmetin atqarý patentin saltanatty túrde tabys etti. Sonymen qatar eki eldiń ókilderi Qurmetti konsýl deklarasııasyna qol qoıdy.
Aıta keteıik, búgingi tańda Vengrııa Qazaqstannyń Shyǵys Eýropadaǵy eń belsendi ekonomıkalyq áriptesi. Geografııalyq alshaqtyǵyna qaramastan, Qazaqstan TMD elderiniń arasynda Reseı men Ýkraınadan keıin Majarstan úshin 3-shi saýda seriktesi bolyp tabylady. QR Ulttyq bankiniń derekteri boıynsha Majarstannan Qazaqstanǵa jalpy tikeleı ınvestısııalardyń aǵymy 85,1 mln. AQSh dollaryn quraıdy. Al, Qazaqstannyń ınvestısııa kólemi 8,7 mln dollar.