Qazaq «Qyzym – úıde, qylyǵy – túzde» deıdi. Buryn balalardyń mekteptegi ilgerindi-keıindi oqý úlgerimin kúndelikti baqylap otyrý múmkin emes edi. Qazir she?
Jýyrda Qaraǵandyda ótken jalpyoblystyq ata-analar jınalysynda oqýshylardyń sabaq úlgerimin qadaǵalap otyratyn «EduNaýk» mobıldik qosymshasy tanystyryldy.
Oblysta muǵalimder men ata-analarǵa yńǵaıly bolý úshin 10 mekteptiń bazasynda synamadan tabysty ótken «Elektrondy synyp jýrnaly» jobasy iske qosyldy.
Qaraǵandy oblysy bilim basqarmasynyń basshysy Ashat Aımaǵambetov atap ótkendeı, jańa oqý jylynan bastap «Elektrondy synyp jýrnaly» jobasyna Qaraǵandy, Balqash, Saran, Temirtaý jáne Shahtınsk qalalarynyń barlyq mektepteri kóshiriletin bolady. Jobanyń maqsaty – muǵalimderdi qaǵazbastylyqtan qutqarý. Baǵalaý ádisin jeńildete otyryp, ata-analarmen keri baılanysqa shyǵýǵa atalmysh qosymsha taptyrmaıtyn qural bolmaq. Bul rette ata-analar Android jáne iOS uıaly telefondaryna «EduNaýk» mobıldik qosymshasyn júkteý arqyly balanyń oqý-úlgerimi men sabaqqa qatysýy, sabaq kestesi jaıly aqparat ala alady. Sonymen qatar, muǵalimdermen birge problemaly máselelerdi talqylaıdy. Mobıldik qosymshalardyń kómegimen ata-analar óz balalarynyń oqý úlgerimi men sapasyn úıde otyryp bile alady. Árbir ata-ana uıaly telefonyna ornatqan tegin mobıldik qosymshaǵa synyp jetekshisi bergen qupııa kiltpen qosylýy kerek.
Mıras ASAN,
«Egemen Qazaqstan»
QARAǴANDY