Úshemge úı syılady

Bul jaǵymdy oqıǵa Talǵarǵa jalǵasyp jatqan Keńdala aýylynda boldy. Dál erteń saılaý bolady degen kúnniń tańerteńinde Aıdar jáne Álııa Toqtarlardyń jas otbasy Qydyr kelip jarylqaǵandaı qýanyshqa keneldi. Úıli boldy. 10 aılyq sábı úshem qyzdar Ánııa, Ázııa jáne Ádııanyń árqaısysynyń jeke bólmesi bar. «Aǵa, osyndaı tamasha jaǵdaı bolǵaly jatyr. Kelip kórińiz. О́zim ala baraıyn», dep jańa­lyq­ty súıinshilegen, ár ýaqytta jaq­sy isterdiń basy-qasynda júretin elgezek qaryndasymyz, Talǵar aýdany ákiminiń orynbasary Raıhan Sadyqova edi. Tilegin birden qup aldyq. Jolshybaı mán-jaıǵa da qanyqtyq. Osydan eki jyl buryn sha­ńy­raq kótergen jas jubaılar Aıdar men Álııa bulaı bolady dep úsh uıyqtasa oılamaǵan, túsine kirmegen. Shańyraq kóterdi degen aty bolmasa, bastarynda baspana­lary joq, páter jaldap turyp jatty. Aıdar Almatyda kúzet qyz­me­tin­de jumys isteıdi. Aı­lyǵy mar­dym­syz. «Jaqyn jyl­dar­da úıli bolamyz-aý» dep, tipti armandaý­dyń ózi qıyn. Sóıtip júrgende, jaqsylyq­tyń alǵashqy nyshanyndaı jary­nyń boıyna bitáná bitti. Sábı – perishte ǵoı. Al, perishte qashanda jaqsylyq habarshysy. Álııa júk­ti­lik kezinde Keńdala ambýlato­rııa­synda esepte turyp, tekserilip júrdi. Dáriger Nurgúl Mát­janova ÝZI quralynyń kómegi­men týashaq nárestelerdiń úsheý ekendigi anyqtalǵannan keıin bo­la­shaq jas anany erekshe baqy­laý­ǵa alǵan. 32 aptadan keıin res­pýb­lıkalyq deńgeıdegi kvota bo­ıyn­sha Álııa Almatydaǵy Ana men bala pedıatrııalyq ortaly­ǵy­na jatqyzylyp, sondaǵy jo­ǵary sanatty dárigerlerdiń qa­raýynda sátimen bosandy. Úshemniń ájesi Raıhan Erqo­ja­qyzynyń ol kúngi qýanyshynda shek bolmady. Úlken shesheleri Súıimhan ájemen aqyl qosyp, úshemniń attaryn anasynyń esimine uıqastyra Ánııa, Ázııa jáne Ádııa dep qoıdy. Bul tuqymda egizder budan buryn da bolǵan kórinedi. Aıdardyń naǵashy ájesi eki márte egiz týǵan, týǵan ápkesi úsh jyl buryn egiz bala kótergen, qazir ózi jap-jas bolsa da tórt balanyń anasy. Bir ókinishi, bas­tarynda baspana joq, páter jaldap turady. Al birden úshemniń ata-anasy atanǵan Aıdar men Álııanyń baspana jaǵynan baǵy jandy. Qýa­nysh­taryna týys-týǵan, kórshi-qolań, aýyl adamdarymen birge aýdan jurtshylyǵy da ortaq­tas­ty. Aýdan ákimdigi jas otbasyn quttyqtap, alǵashqy kúnnen-aq arba, balalar taǵamdary men pampers, azyq-túlik túrindegi syı­lyq­taryn úzbedi. Aýdan ákimi Tal­ǵat О́mirálıev qýanyshty oqı­ǵ­any oblys basshylyǵyna habarlap, qulaqqaǵys etip ári úısiz-kúı­siz júrgen jas otbasyna baspana áperý jóninde ótinishin de túsirgen-di. Dál osyndaı ıgi isterde árqashan izgilikten jańyl­mas Almaty oblysynyń ákimi Serik Úmbetov jas otbasyna baspana áperý úshin oblys bıýdjetinen 6,5 mln. teńge qarjy bólgizdi. Minekı, sol qarjyǵa satyp alynǵan úıdiń kiltin saltanatty jaǵdaıda tabys etýdiń súıinishti sáti de naq keshe, el Prezıdentin saılaýmen tuspa-tus jetken eken. Mansardy menmundalaǵan, alty bólmeli eńseli úı. Áp-ádemi shar­baqtalyp qorshalyp, aýlasyn kóp­tiń kómegimen kóz tartardaı kórkeıtip abattandyryp tastap­ty. Aýdandyq mádenıet úıiniń án­shi-kúıshi ónerpazdary da osynda. Ásem saz-áýen qalyqtap, kún de shýaq shashyp turdy. Talǵat Ábenuly kiltimen qosa úıdiń tólqujaty men jer telimi­niń memlekettik aktisin úsh arbashamen úshemdi terbetip turǵan baqytty jup Toqtar Aıdar men Álııanyń qoldaryna ustatty. Sóı­tip, jas otbasynyń jańa bas­pa­nasyna qutty bolsyn aıtyp, munyń ózi qydyr turaqtaǵan eldiń, baq-bereke baıyrqalaǵan baı­taq Otannyń qamqorlyq-syı­lyǵy ekendigin erekshe atap kór­setti. Sonymen qatar, aýdan ákimi ózi de qur qol kelmeı, úshem sábı­diń úıine baıǵazy retinde tońa­zyt­qysh, avtomatty kir jýǵysh má­shıne, televızor, shańsorǵysh sııaq­ty turmys zattaryn, kilemder men balalar taǵamdaryn ala kelip syıǵa tartty. Úı alǵan úshemder bul sátter­de eshteńe sezbesten, alańsyz pysyldap, meıirimdi qushaqtarda meıirli Otan shapaǵatymen syı­lanǵan muntazdaı meshitti ǵalam úılerine kirip bara jatty. Qorǵanbek AMANJOL, Sýretterdi túsirgen Sábıt MUHANBAEV.