"Báıterek" ulttyq basqarýshy holdıngi bıylǵy jumys josparyn birneshe baǵytta órbitpek. Birinshiden, otandyq avtokólik óndirisine qoldaý kórsetedi. Ekinshiden, eksportqa deıingi jáne eksport kezinde kásipkerlerge qoldaý kórsetedi. Úshinshijen, turǵyn úı ınfraqurylymyn damytpaq. Bul týraly holdıng basshysy Erbolat Dosaev málimdedi.
«Transporttyq mashına qurylysynyń damýyna keler bolsaq, otandyq avtokólik óndirisine 35 mlrd teńge bólindi. Olar ekinshi deńgeıli bankter arqyly jeńildetilgen nesıe berýge arnaldy. Sonyń ishinde 26 mlrd teńge kólik quraldarynyń lızıngtik qarjylandyrylýy bolsa, odan bólek jolaýshylar vagony óndirisi de osy joba aıasynda qolǵa alyndy», — dedi Erbolat Dosaev.
Sonymen qatar otandyq bıznestiń eksporttyq áleýetin arttyrý úshin 2015 jyly 50 mlrd teńge, 2016 jyly 45 mlrd teńge bólingenin aıtty.
Onyń aıtýynsha, holdıng endi turǵyn úı ınfraqurylymyna qarjy salmaq. "Nurly jer" baǵdarlamasy aıasynda qurylys kompanııalaryn tikeleı qarjylandyrýdy qoıyp, endi ákimdikterdiń oblıgasııalaryn satyp alý arqyly jáne belgili bir shartpen ekinshi deńgeıli bankterge salý arqyly turǵyn úı sektoryna qoldaý bermek.
«Ákimdikter oblıgasııasynyń birinshi satyp alýy 2016 jyly bolǵan edi. Ol kezde 38,2 mlrd teńgeniń qaryzyn satyp aldyq. 2018 jyldyń 1 qańtarynan bastap turǵyn úı qurylysynyń barlyq baǵyttary boıynsha oblıgasııa nemese EBD arqyly atqarýshy bılikke beriletin bolady", - dedi Erbolat Dosaev.