Syrtqy ister mınıstri Qaırat Ábdirahmanov pen Investısııalar jáne damý mınıstri Jeńis Qasymbek qazaqstandyq ónim eksportyn ilgeriletý jónindegi ózara is-qımyldy kúsheıtý boıynsha Birlesken is-sharalar josparyna qol qoıdy.
Jospar Qazaqstan Prezıdenti Nursultan Nazarbaevtyń 2017 jylǵy 31 qańtardaǵy Qazaqstan halqyna «Qazaqstannyń Úshinshi jańǵyrýy: jahandyq básekege qabilettilik» atty Joldaýyndaǵy ekonomıkalyq dıplomatııany jandandyrý boıynsha tapsyrmalaryn oryndaý maqsatynda ázirlengen.
Eksporttyq jáne ınvestısııalyq baǵyttardy tyǵyz baılanystyrý qajettiligi jospardyń tujyrymdamasyna negizdelgen. Bul jaıt Memleket basshysynyń tapsyrmasymen ázirlenip jatqan ulttyq eksporttyq jáne ınvestısııalyq strategııalarda qarastyrylǵan.
Jospardyń iske asyrylýy árbir taýardy ótkizýge yqtımal naryqtardy tereń taldaýǵa jáne suranys deńgeıine negizdeledi. Bul rette, joǵary qun qosylǵan ónimderge erekshe nazar aýdarylady.
Q.Ábdirahmanov pen J.Qasymbek jospardaǵy is-sharalar eki mınıstrliktiń búkil áleýetin iske qosýǵa múmkindik týǵyzady dep senedi. Osy jumysqa Qazaqstannyń shet elderdegi mekemeleri, sondaı-aq keleshekte qurylatyn «Kazakh Export» eksportty ilgeriletý jónindegi ulttyq operator belsendi túrde tartylatyn bolady. Onyń negizgi mindeti – otandyq óndirýshilerge qazaqstandyq ónimderdi sheteldik naryqtarǵa ilgeriletý boıynsha járdem kórsetý.
Syrtqy ister mınıstrligi jýyrda Aýyl sharýashylyǵy mınıstrligimen de birlesken jospar qabyldaǵan bolatyn. Bul qujat el agroónerkásiptik keshenin ınvestısııalyq jáne eksporttyq baǵyttarda damytýdaǵy mınıstrlikterdiń kúsh-jigerin birlestirý men úılestirýge jol ashady.
«Egemen-aqparat»