Ortalyq kommýnıkasııalar qyzmetinde «Qazaqstan» RTRK» AQ men Clearwater Documentary Inc. kompanııasynyń birlesken jobasy - «EQUUS» (Jylqy) derekti trılogııasyna qatysty memorandýmǵa qol qoıý sharasyna arnalǵan baspasóz máslıhaty ótti.
Oǵan Aqparat jáne kommýnıkasııalar mınıstri Dáýren Abaev, «Qazaqstan» RTRK» AQ Basqarma tóraǵasy Erlan Qarın, kanadalyq rejısser, antropolog Naıobı Tompson men prodıýser Nurbol Baımuhanov qatysty.
Kezdesýde «EQUUS» (Jylqy) halyqaralyq jobasynyń óndiristik jumystary talqylandy. Onda áýeli Dáýren Abaev jobanyń elimizdiń tarıhy men dástúrin qamtyp, halyqaralyq arenadaǵy ımıdjin qalyptastyrýǵa múmkindik beretinin atap ótti.
-Bul biz úshin mańyzdy joba. Bizdiń el jylqyny alǵash qolǵa úıretken jáne atbegilik ónerdiń negizin qalyptasyrǵan el. Sondyqtan shetel ǵalymdarynyń Qazaqstanǵa qyzyǵýshylyǵy tegin emes.
Jylqyny qolǵa úıretken ata-babalarymyz órkenıettiń damýyna qomaqty úles qosty. Eger este joq eski zamanda adamdar atqa otyrmaǵanda qazirgi órkenıetimiz bolmas edi. Jylqy qazaq jerinde úıretilgen soń ǵana atqa otyrǵan adamnyń barys-kelisi kóbeıdi, salt attyly adam jańa mádenıetterdi tanydy, jańa jerlerge qonystandy, sóıtip, adamnyń ómiri jańalyqtarmen tolyǵyp, órkenıetimiz damyp otyrdy. Sol sebepti osy fılmde jylqy janýarynyń adamzat tarıhyndaǵy róli týraly keńirek baıandalady. Jobaǵa Qazaqstan, Kanada, AQSh, Fransııa men Germanııa elderi qatysady. Derekti trılogııa kelesi jyly aıaqtalyp, 50 elge taraıdy, – dedi ol.
Osyǵan baılanysty Erlan Qarın brıfıngte «EQUUS» jobasynyń túsirilim jumystary bıyl Qazaqstan aýmaǵynda bolatynyn, oǵan qazaqstandyq kınematografıster, akterler, dýblerler, óner jáne dızaın salasyndaǵy kásibı mamandar tartylyp, kanadalyq túsirilim tobymen birigip jumys isteıtinin aıtty. Sonymen birge ol jobaǵa bastamashy bolyp, qoldaý kórsetken Aqparat jáne kommýnıkasııalar mınıstrine alǵysyn bildirdi.
Kezdesýde kanadalyq rejısser de serıalǵa baılanysty óz oıymen bólisti. Ol Qazaqstan Batys elderi úshin ashylmaǵan aral sııaqty qyzyqty el ekenin, sonysymen qazaq jeri búkil álemge tartymdy bolyp kórinetinin, qazirgi Qazaqstan aýmaǵynda jylqynyń qolǵa úıretilgeniniń ózi adamzat tarıhy úshin baǵa jetpes oqıǵa dep sanaıtynyn aıtty.
–Eýrazııa keńistiginiń kindiginde ornalasqan sizderdiń elderińiz aýyz toltyryp aıtatyndaı oqıǵalarmen erekshelenip otyr. Qazaq jerinde jylqy qolǵa úıretilgen soń adamzat tarıhy men órkenıeti úlken ózgeriske ushyrady. Eger jylqy bolmaǵanda, ol qolǵa úıretilmegende qazirgi ómirimiz bolmas edi. Adamzattyń tarıhy salt attylarmen tyǵyz baılanysty. Biz jylqy týraly derekti trılogııany túsirgende onyń máni men mańyzyna basa nazar aýdaratyn bolamyz. Meniń bilýimshe, jylqy qazaq halqy úshin asa qasterli janýar. Ol kólik qana emes, emdik qasıeti mol janýar ekenin estip júrmin. Batys elderi muny bilmeıdi. Al sizderdiń ata-babalaryńyz ony 6 000 jyl buryn bilip alǵan. Sondyqtan fılmde jylqyny ǵylymı zertteý jaǵyna mán beremiz, – dedi ol.
Dastan KENJALIN, «Egemen Qazaqstan»