Qazaqstan elshiligi, Máskeý qalalyq mádenıet departamenti jáne «Máskeý kınosy» bıýdjettik mádenıet mekemesiniń qoldaý-bastamasymen Reseı astanasynda «Dostarymyzdyń kınosy» dep atalatyn halyqaralyq kınoforým ótti. Onyń baǵdarlamasy Eýropa, TMD, Shyǵys Azııa jáne Kavkaz elderinde shyǵarylǵan alpystan astam fılmderdi qamtıdy. Forým aıasynda Máskeýdiń «Vladıvostok», «Neva», «Satýrn», «Svoboda», «Spýtnık», «Týla» jáne t.b. kınoteatrlarynda reseılik kórermenge burynnan belgili Rıga stýdııasynyń, Dovjenko atyndaǵy stýdııanyń, «Tallınfılm», «Belarýsfılm», «Azerbaıjanfılm», «Armenfılm», «Grýzııa-fılm», «О́zbekfılm», «Qyrǵyzfılm», «Qazaqfılm» kompanııa-stýdııalarynyń týyndylarymen birge, Kýba, Polsha, Rýmynııa, Germanııa, Chehııa sııaqty elderdiń kınoshyǵarmalary da kórsetildi.
Atalǵan forým kezinde Qazaqstan kınosynyń kúni Arbat alańyndaǵy «Hýdojestvennyı» kınoteatrynda ótti. Bul kúni qazaqstandyq rejısserler men avtorlardyń (Aqtan Arym Qubat, Qýat Ahmetov, Sábıt Qurmanbekov, Danııar Salamat, Qanaǵat Mustafın, Lev Vahıtov, Ardaq Ámirqulov, Murat Jákibaev, t.b.) «Jumaq kilti», «Kútpegen mahabbat», «Jel adam», «Siz kimsiz, Ka myrza?», «Ákem ekeýmiz», «Sekirý», «Seker» kórkem fılmderimen birge, «Rahmet aıtyp úlgerý», «Mataı, ańyzdyń bastaýy» derekti fılmderi jurtshylyq nazaryna usynyldy.
Qazaqstan kınosy kúniniń ashylý rásimine qatysqan elshi Zaýytbek Turysbekov óz sózinde búgingi tańdaǵy ıntegrasııalyq úderisterdiń mádenı saladaǵy baılanystardy da jandandyrǵanyna kópshilik nazaryn aýdaryp, bul kınoshyǵarmalar adamdardyń qarym-qatynastaryn nyǵaıtyp, ózara dostyq pen túsinistik uǵymdaryn tereńdete túsetindigin atap kórsetti.
Serikqalı BAIMENShE, «Egemen Qazaqstan» – Máskeýden.