Iran Islam memleketinen kelgen ınvestorlar Ońtústik Qazaqstan oblysynan jylyna 20 myń tonna et eksporttaýǵa kirispek. Ekijaqty kelisim nátıjesinde júzege asatyn bul joba jergilikti sharýalardyń mal bordaqylaýǵa degen qyzyǵýshylyǵyn týǵyzýǵa tıis. Bul týraly aımaqtaǵy sharýalardy kásipke baýlyp, sharýashylyqqa beıimdeý maqsatynda ótip jatqan kóshpeli semınarda Ońtústik Qazaqstan oblysynyń ákimi Janseıit Túımebaev málim etti, dep habarlaıdy oblys ákiminiń baspasóz qyzmeti.
Qazyǵurt aýdany Sharbulaq aýylyndaǵy «Qaıyp ata» mal bordaqylaý kesheninde ótken kóshpeli semınarǵa Iran elinen kelgen ınvestorlarmen qatar aýdan, qala ákimderi, aýyl sharýashylyǵy basqarmasynyń mamandary, sharýa qojalyq ıeleri jáne ǵylymı ortalyqtar men nesıelik qarjy ınstıtýttarynyń ókilderi qatysty.
Semınardyń maqsaty - sharýalar men memlekettiń arasyndaǵy qarym-qatynasty nyǵaıta otyryp, aýyl sharýashylyǵynyń damýyna serpin berý. Usaq sharýa qojalyqtarynyń birigýine múmkindik jasap, sol arqyly ónim kólemin arttyryp otandyq taýardy shetelge eksporttaý.
«Elimizde aýyl sharýashylyǵymen onyń ishinde mal sharýashylyǵymen aınalysatyn sharýalarǵa memleket tarapynan qoldaý joǵary dengeıde. Osy oraıda aýyl sharýashylyǵy kooperatıvterin qurý, nesıeleý jáne sýbsıdııalaý máselelerin halyqqa túsindirip sharýalardy ata kásipke baýlý qajet. Ekologııalyq turǵydan taza ónim sanalatyn bizdiń ónimderimizge ózge elderdiń suranysy óte joǵary. Osyny tıimdi paıdalanýymyz kerek», -dedi Janseıit Qanseıituly.
Aıta keteıik, Qazǵurt aýdanyndaǵy «Qaıypata» ceriktestigi negizinen mal bordaqylaýmen aınalysady. Búgingi tańda munda 3 myń bas iri qara bordaqylanyp jatyr. Mal bordaqylaý alańyndaǵy aqbas sıyrlar orta eseppen 300-350 kelige deıin et beredi. Al Iran Islam memleketi jylyna 2 mln 400 tonna et tutynady. Osy qajettiliktiń bir bóligin qamtý maqsatynda, eki tarap kúnine 3000 bas usaq mal eti men 100 bas men iri qara etin alý úshin kelisim shart jasasty.
Sonymen qatar, aldaǵy ýaqytta óńirimizde iriqara mal qaýymdastyǵyn qurý kózdelip otyr.