Ortalyq kommýnıkasııalar qyzmetinde «EKSPO-2017» halyqaralyq kórmesi kezinde ótkiziletin sharalarǵa arnalǵan baspasóz máslıhaty ótti.
Brıfıngke «Astana EKSPO-2017» AQ sharalardy uıymdastyrý jáne kontent departamentiniń dırektory Marat Omarov, kanadalyq CIRQUE DU SOLEIL® pavılony jobasynyń dırektory Bernar Pýre men «Reflekt» shoýynyń rejısseri Fernan Reınvıl qatysyp, ózderiniń joba-josparlarymen tanystyrdy.
– Bıylǵy kórmege 45 DEGREES kompanııasynyń ókilderi keledi. Olar EKSPO kezinde halyqtyń nazaryna oıyn-saýyq baǵdarlaamalaryn usynady. Bul kompanııa dúnıe júzine keńinen tanylǵan CIRQUE DU SOLEIL® tobyna kiredi. Amerıkalyq qonaqtar 16 maýsym men 10 qyrkúıek aralyǵynda 71 qoıylym kórsetýdi josparlap otyr. Olardyń bári ózderiniń pavılonynda bolady, – dedi M.Omarov.
Al kanadalyq mamandardyń aıtýynsha, CIRQUE DU SOLEIL® pavılonynda 2 000-nan astam adam emin-erkin qoıylymdardy tamashalaı alady. Árbir sharanyń baǵasy 4 000 teńge kóleminde bolady.
– Bizdiń kompanııa 1984 jyly qurylǵan. Sol kezde kóshede óner kórsetip júrdik. Keıin CIRQUE DU SOLEIL® tobyna basqa da ártister kelip, qatarymyz tolyqty. Qazir bizdiń ujymda 50 elden 4 000-ǵa jýyq adam qyzmet etedi. 1 300 ártisimiz bar. Osy kezge deıin birneshe ret álemdi aınalyp, 60 elde óner kórsettik. 400 qalada boldyq. Bizdiń kórermenderimiz sany 160 mıllıonǵa jetti, – deıdi «Reflekt» shoýynyń rejısseri Fernan Reınvıl.
Dastan Kenjalın,
«Egemen Qazaqstan»