Premer-mınıstrdiń orynbasary – ulttyq ekonomıka mınıstri Serik Jumanǵarın Qazaqstanmen 2026-2031 jyldarǵa arnalǵan áriptestiktiń jańa negizdemelik strategııasy boıynsha konsýltasııalarǵa arnalǵan Dúnıejúzilik bank tobynyń ókilderimen kezdesý ótkizdi, dep habarlaıdy Egemen.kz.
Kezdesýdi ashqan Serik Jumanǵarın yntymaqtastyqtyń strategııalyq sıpatyn atap ótip, 2031 jylǵa deıingi ózara is-qımyl baǵdaryn aıqyndaıtyn qujatty daıyndaǵany úshin rızashylyǵyn bildirdi.
«Biz Dúnıejúzilik bankpen áriptestikti joǵary baǵalaımyz. Usynylǵan strategııa saraptama, qarjylandyrý jáne birlesken bastamalar arqyly bizdiń reformalardy qoldaý úshin negiz jasaıdy», dep atap ótti vıse-premer.
Kólik jáne sıfrlyq baılanysty damytýdy, sý jáne energetıka sektorlarynda kórsetiletin qyzmet sapasyn arttyrýdy, qarjy naryǵyn damytýdy, jeke ınvestısııany yntalandyrýdy, klımattyq saıasatty kúsheıtýdi jáne jańartylatyn energııa kózin paıdalanýdy arttyrýdy qosqanda, strategııa jobasynda belgilengen basymdyqtar Qazaqstannyń áleýmettik-ekonomıkalyq damýynyń strategııalyq qujattary men maqsattaryna sáıkes keledi.
Banktiń alty jyl ishinde jyl saıyn $1 mlrd-qa deıin qarjylandyrýǵa daıyndyǵy da atap ótildi. Vıse-premerdiń aıtýynsha, bul jeke sektordy nyǵaıtý, ınfraqurylymdy damytý men ekonomıkanyń básekege qabilettiligin arttyrý úshin qosymsha jaǵdaı jasaıdy. Reformalardy taldamalyq súıemeldeý Qazaqstan Úkimeti men Dúnıejúzilik banktiń birlesken Ekonomıkalyq zertteý baǵdarlamasy sheńberinde jalǵasady.
Kezdesý barysynda 2020-2025 jyldarǵa arnalǵan aldyńǵy Strategııany iske asyrýdyń qorytyndysy shyǵaryldy. Osy kezeńde jalpy somasy $4,2 mlrd kólemindegi 14 joba iske asyryldy. Olardyń qatarynda «Batys Eýropa-Batys Qytaı» halyqaralyq tranzıttik dálizin damytý, «Almaty-Qorǵas» avtojolyn qaıta jańartý, ırrıgasııalyq jáne drenajdyq júıelerdi jańǵyrtý jáne t. b. bar.
Dúnıejúzilik banktiń Qazaqstan men Túrkimenstandaǵy turaqty ókili Andreı Mıhnev ótken kezeń pandemııany qosqanda, birqatar syrtqy syn-qatermen qatar júrgenin, bul rette taraptardyń ózara is-qımyly belgilengen bastamalardy iske asyrýǵa jáne is júzinde nátıjelerge qol jetkizýge yqpal etkenin atap ótti.
Onyń aıtýynsha, «Shyǵys-Batys» jáne «Ońtústik-Batys» jobalary «Batys Eýropa - Batys Qytaı» kólik dálizin damytyp, 5 mıllıonnan astam adamǵa shaqqandaǵy baılanysty jaqsartty. Jol júrý ýaqyty úshten ekige qysqaryp, qozǵalys jyldamdyǵy úsh ese ósti. Kólik shyǵyndary 35%-ǵa tómendedi. 1 200-den asa turaqty jumys orny qurylǵan. Turǵyndardyń 93%-y ómir súrý sapasynyń artqanyn atap ótken.
Shaǵyn jáne orta bıznesti qoldaý myńnan astam kásiporynǵa granttyq jáne konsýltasııalyq kómek kórsetýge múmkindik berdi. 175 startap $41 mln satylymdy qamtamasyz etti jáne $16 mln ınvestısııa tartty.
Irrıgasııalyq ınfraqurylymdy jańǵyrtý jónindegi joba sý paıdalanýdyń tıimdiligin 92 myń gektarǵa arttyryp, 60 myń fermerdi qosqanda, 94 myń sý paıdalanýshynyń jaǵdaıyn jaqsartty. 763 shaqyrym arna jańartylyp, ónimdiliktiń ósýine jáne jumys oryndarynyń qurylýyna yqpal etti. Agrarlyq sektorda sýbsıdııalaý júıesin reformalaýǵa qosymsha taldamalyq qoldaý kórsetildi.
Halyqaralyq qarjy korporasııasynyń (IFC) ókilderi memlekettik-jekeshelik áriptestik jobalaryn konsýltasııalyq qoldaýdy, sondaı-aq jeke ınvestorlarǵa kredıt berý men olardyń qatysýyn arttyrýdy qosa alǵanda, ınvestısııalyq qyzmetti jalǵastyrý jospary týraly habarlady. Mysal retinde QTJ qatysýymen Almaty aınalma temirjolyn qarjylandyrý jobasy keltirildi.
Budan arǵy basymdyqtardyń qatarynda temir jol ınfraqurylymyn jańǵyrtý, qarjy ınstıtýttary arqyly shaǵyn jáne shaǵyn bıznesti qoldaý, zamanaýı aýyl sharýashylyǵy tehnıkasy men astyqty tereń óńdeý jobalaryn jetkizýdi qarjylandyrýdy qosqanda, agroónerkásiptik keshendi damytý bar.
Kezdesý qorytyndysy boıynsha taraptar strategııa jobasyn aıtylǵan usynystardy eskere otyryp pysyqtaýǵa jáne ony Dúnıejúzilik Banktiń Dırektorlar keńesiniń qaraýyna usynýǵa ýaǵdalasty.