Bochchadan halyqaralyq týrnırdiń ashylý rásimi ótti

Máýlen Áshimbaev saltanatty rásimde sóılegen sózinde saıysqa qatysýshylarǵa iltıpat bildirip, Qazaqstanda ınklıýzıvti qoǵam qurý Memleket basshysy Qasym-Jomart Toqaevtyń saıası baǵdarynyń mańyzdy basymdyqtarynyń biri ekenin atap ótti. Sondaı-aq ol Kanada, Qytaı, Uly­brı­tanııa, Fransııa, Portýgalııa, Ońtústik Koreıa, Brazılııa jáne basqa da mem­leket­terdiń ókilderi baq synaıtyn halyqaralyq dodanyń aýqymy keń ekenine nazar aýdardy. Is-sharada osyndaı deńgeıdegi jarystyń Qazaq­standa ótýi elde paralımpıadalyq qoz­ǵa­lysty damytý jáne ár azamatqa teń múm­kindik jasaý baǵytynda atqarylyp jatqan jumystyń nátıjesi ekeni de aıtyldy.

«Astana 2026 World Boccia Cup» týrnıri Qazaqstan Bochcha federasııasymen qatar elimizdegi paralımpıadalyq qozǵalys úshin de mańyzdy oqıǵa. Búginde Prezıdent Qasym-Jomart Toqaevtyń qoldaýymen elimizde parasportty damytýǵa jáne barsha azamatqa teń múmkindik jasaýǵa erekshe kóńil bólinip keledi. Parasportshylardyń jattyǵýyna, halyqaralyq jarystarǵa qatysýyna jáne óz áleýetin tolyq júzege asyrýyna qajetti jaǵdaı jasalyp keledi. Astanada sporttyq, medısınalyq, ońaltý jáne bilim berý ınfraqurylymyn biriktirgen elimizdegi alǵashqy biregeı Inklıýzıvti sport ortalyǵynyń ashylýy sonyń jarqyn kórinisi. Memleket basshysynyń tapsyrmasymen elordadaǵy bul tájirıbe Qazaqstannyń basqa óńirlerinde de kezeń-kezeńimen iske asyrylady», dep, Máýlen Áshimbaev Halyqaralyq bochcha federasııa­syna jáne týrnırdiń Qazaqstanda ótýine atsalysqan seriktesterge alǵys bildirdi.

Bochcha Qazaqstanda jaı ǵana sport emes. Ol búginde myńdaǵan múmkindigi shekteýli azamat pen olardyń otbasylary úshin áleý­met­tik ıntegrasııa men ońaltýdyń mańyz­dy tetigine aınaldy. Osy rette bochchadan Qazaqstan ulttyq quramasynda qazir elýge jýyq parasportshy óner kórsetetinin atap ótken jón. Jarystyń ashylý rásiminde keıingi jyldary Qazaqstan Bochcha federa­sııasy jattyqtyrýshylar, paraatletter, olardyń ata-analary, sondaı-aq, eriktiler­men birge bul sportty damytý baǵytynda aýqymdy jumys atqarǵanyna da mán berildi.

«Bochcha – erekshe sport túri. Ol erik-jiger men asqaq rýh, tabandylyq pen qaısar minez arqyly kez kelgen qıyndyqty eńserýge bolatynyn dáripteıdi. Búgin jarys alańyna shyǵatyn ár sportshy – batyldyqtyń, tózimdiliktiń jáne ózine degen senimniń jarqyn úlgisin kórsetip otyr. Astanada álem kýbogi úshin jarystyń ótýi Qazaqstanda bochchanyń odan ári damýyna tyń serpin beretini anyq», dedi Máýlen Áshimbaev.

Sonymen qatar bochchany zamanaýı óner arqyly keńinen nasıhattaý máselesine de erekshe kóńil bólindi. Bul rette kórermenniń yqylasyna bólenip, sheteldik áriptesterdiń joǵary baǵasyna ıe bolǵan «Erekshe» kórkem fılmi áńgimege arqaý boldy.

Aıta keteıik, «Astana 2026 World Boccia Cup» halyqaralyq týrnıri 2026 jylǵy 1-9 maýsym aralyǵynda ótedi. Álem kýboginiń bul kezeńi resmı reıtıngtik jarystar júıesindegi báseke jáne aldaǵy Los-Andjeles Paralımpıadasyna joldama beretin mańyzdy irikteý kezeńderiniń biri sanalady.

О́z alańymyzda ótetin dúbirli dodada Qazaqstan namysyn 10 sportshy qorǵaıdy. Olardyń úsheýi qozǵalys múmkindigi asa shek­teýli BC3 sanatyndaǵy sportshylar. Olar arnaıy rampa arqyly dopty baǵyttap, jarys barysynda assıstentterdiń kómegine súıenedi. Jarystar jekeleı, juptyq jáne komandalyq syndar boıynsha ótkiziledi.

Qazaqstandyq parasportshylardy daıarlaý jáne oqý-jattyǵý jıyndaryn ótkizý úshin Portýgalııadan tájirıbeli bapker Roberto Mateýsh shaqyrylǵanyn da atap ótken jón. Mamandar quramyna qosylǵan jat­tyqtyrýshy halyqaralyq jarys qar­sańynda komandanyń tehnıka­lyq jáne taktıkalyq daıyndyǵyn jetildirýge basymdyq berip, tıisti jumys júr­gizdi. Jalpy, atalǵan týrnır Qazaqstan Respýb­lıkasy Týrızm jáne sport mınıstrliginiń jáne seriktesterdiń qoldaýymen uıymdastyryldy.

Sonymen qatar Senat tóraǵasy Halyq­ara­lyq bochcha federasııasynyń prezı­denti Djon Morganmen kezdesti. Tarap­tar para­lım­pıadalyq sporttyń qazirgi ahýaly men ony odan ári damytý perspektıvalaryn, Qazaqstanda bochcha sportyn keńinen nası­hattaý máselelerin, osy baǵyttaǵy halyq­aralyq yntymaqtastyqty nyǵaıtý jol­daryn, sondaı-aq, sportshylar men jattyq­tyrýshylardy iri halyqaralyq jarystarǵa daıarlaý isin qoldaý tetikterin talqylady.

Kezdesý barysynda Djon Morgan Qazaqstannyń halyqaralyq seriktestikke ashyq ári syndarly ustanymyna joǵary baǵa berip, halyqaralyq federasııa ınklıýzıvti qoǵam qurýǵa baǵyttalǵan birlesken bastamalardy qoldaýǵa daıyn ekenin atap ótti.