Álem shabandozdary bas qosqan alaman

Elorda tórin dúbirge bó­le­gen aıtýly is-shara Ha­lyq­aralyq at sporty fede­rasııasynyń (Fédération Équestre Internationale – FEI) qoldaýymen ótti. Týrnırdiń basty ereksheligi – bir mezette úsh halyqaralyq jarystyń uıymdastyrylýy. Atap aıtqanda, FEI Álem kýboginiń kezeńi, FEI «World Cup Challenge» fınaly jáne CDI1*/CDI3* baǵdarlamalary boıynsha sportshylar ózara myqtyny anyq­tady.

Bıyl Germanııanyń Ahen qala­synda at sportynan álem chempıonaty ótedi. Astanadaǵy halyqaralyq týrnır sol jahandyq dodaǵa irikteý kezeńderiniń biri sanalady. Osyǵan baılanysty otandyq sportshylar halyqaralyq reıtıngtik upaılardy endi sheteldegi jarystarda ǵana emes, elimizde ótken bedeldi týrnırde de jınaýǵa múmkindik aldy.

Elimizde tuńǵysh ret uıym­dastyrylǵan halyqaralyq dodada jergilikti sportshylar Brazılııa, Kolýmbııa, Úndistan, Marokko, Jańa Zelandııa, Ońtústik Afrıka Respýb­lıkasy, Mysyr, Ekvador, Reseı jáne О́zbekstannan kelgen tájirıbeli qarsylastarymen baq synasty. Bul jarys otandyq at sportynyń halyq­aralyq deńgeıdegi baılanysyn keńeıtip, shabandozdarymyzdyń tájirıbe almasýyna jol ashty.

Jarys baǵdarlamasyna konkýr men atpen mánerlep júrý (dressaj) saıystary engizildi. Qatysýshylar ár baǵdarlamada joǵary sheberlik pen tyńǵylyqty daıyndyǵyn kórsetti. Ásirese bıiktigi 160 santımetrge deıingi kedergilerden sekirý básekesi kórermenderdiń erekshe qyzyǵýshylyǵyn týdyrdy. Álem kýboginiń kezeńi men Gran-prı jarystarynyń mártebesi joǵary bolǵandyqtan, árbir shabandoz jeńis jolynda  aıanyp qalǵan joq.

Týrnır FEI «Jumping World Challenge Final» irikteý jarysymen, CSI-W Álem kýbogi kezeńimen bas­taldy. Bıiktigi 125 santımetr­lik kedergilerden sekirý saıysynda ózbekstandyq Hýrshıdbek Álimjanov «Champions League» tul­parymen jeńiske jetti. Bizdiń Bek­jan Baıjanuly «King Diamond» sáıgúligimen kúmis júldege ıe bol­sa, qyrǵyzstandyq Rınat Galımov úz­dik úshtikti túıindedi.

FEI  «Jumping World Challenge ­Final 2026» baǵdarlamasynyń alǵash­qy irikteý kezeńinde ózbekstan­dyq Bekzod Rozmýhamedov úzdik nátıje kórsetti. Ekinshi oryn brazılııa­lyq Bernardo Kraýs Gerraǵa buıyrsa, jańazelandııalyq Eımı Kollınson úshinshi orynnan kórindi.

Alǵashqy kúnniń eń jaýapty syn­darynyń biri «CSI-W FEI Jumping World Cup» aıasyndaǵy «Bank center credit equestrian cup» Gran-prıine irikteý jarysy boldy. Bıiktigi 140 santımetrlik kedergilerden sekirýde bizdiń Oleg Soko­lenko «Cinderella» tulparymen úzdik óner kórsetip, jeńimpaz atandy. Beıtarap mártebedegi Sergeı Petrov kúmis júlde ıelense, Olesıa Lýkına qola medalǵa qol jetkizdi.

Halyqaralyq týrnırge tyń­ǵy­lyqty daıyndalǵan ózbekstandyq Bekzod Rozmýhamedov «Challenge Final» baǵdarlamasynyń ekin­shi irikteý jarysynda da qarsylas­ta­rynan oq boıy ozyq shyqty. Marok­kolyq Nal Zerýal ekinshi oryn alsa, Bernardo Kraýs Gerra taǵy bir márte júldegerler qatarynan kórindi. Qazaqstandyq Ánýar Dosmaılov al­ǵashqy bestikten oryn aldy.

Dressaj baǵdarlamasyndaǵy báse­­kelerde de joǵary nátıje tir­kel­­di. CDI 1* FEI Dressage baǵ­dar­lamasynyń St. George synynda ózbekstandyq Alına Shevsova top jardy. Qyrǵyzstandyq Ekaterına Karkavseva kúmis júldege ıe bolsa, qazaqstandyq Darıa Popova úzdik úshtikti qorytyndylady.

Saıystyń ekinshi kúni ótken «CDI Intermediate I» baǵdarlamasynda Darıa Popova kúmis júldeger atandy. Al Grand Prix «Bank center credit cup» CDI 3* jarysynda taǵy da Alına Shevsova jeńis tuǵyrynyń eń bıik satysyna kóteril­di. Ekaterına Karkavseva úshinshi oryndy ıelendi.

«CSI-W FEI Jumping World Cup» baǵdarlamasy boıynsha 135 santımetrlik kedergilerden sekirýde Oleg Sokolenko qola medal jeńip aldy. Al «Ultima yandex cup» jarysynda Raısa Sokolenko «Uran-nad Wigrami» tulparymen tamasha óner kórsetip, Qazaqstan qorjynyna altyn medal saldy.

Týrnırdiń eń áserli sátteriniń biri «Six Bar Jump-Off» saıysy boldy. Bul básekede kedergilerdiń bıik­­tigi kezeń-kezeńimen 170 san­tı­metrge deıin kóterilip otyr­dy. Nátıjesinde, Núrıla Turysbe­kova men Iаsmın Ibragımova úzdik shy­ǵyp, elimizge taǵy eki altyn júlde syılady.

Úshinshi jarys kúni «FEI Jum­ping World Challenge Final» jeńim­pazdary anyqtaldy. «Final Compe­tition – Challenge Final» (120 sm) baǵdarlamasynda brazılııalyq Ber­nar­do Kraýs Gerra jeńiske jetti. Kúmis júlde Bekzod Rozmýhamedov­ke buıyrsa, kolýmbııalyq Nıko­las Rod­rıges Posada úzdik úshtikti túıindedi.

Bul baǵdarlamada jerlesterimiz joǵary nátıje kórsete almaǵany­men, «CSI-W AEF/Mantena Cup» ­(135 sm) saıysynda esesin qaıtar­dy. Oleg Sokolenko «Shenanigan» tulpa­rymen jeńimpaz atanyp, «Selly Blue» sáıgúligimen taǵy bir márte kúmis júldege qol jetkizdi. Al qyz­dar arasyndaǵy básekede Núrıla Turysbekova qola medal enshiledi.

Týrnırdiń sharyqtaý shegi sanalatyn «Grand Prix Maxima Masters Eurasia Cup CSI-W» (160 sm) jarysy da joǵary deńgeıde ótti. Bul synda beıtarap mártebedegi Bogdan Vaskovskıı «Emilion fonroque» tulparymen jeńiske jetti. Ksenııa Haırýlına kúmis júldeger atansa, qyrǵyzstandyq Kamıl Sabıtov qola medal ıelendi.

Dressaj baǵdarlamasyndaǵy «Inter­mediate i freestyle aef/Mantena CUP» saıysynda Darıa Popova qola júldege ıe boldy. Al «grand prix freestyle CDI 3* baǵ­darlamasynda Alına Shevsova taǵy da óziniń jo­ǵary deńgeıin dáleldep, jarystyń jeńimpazy atandy.

Elordadaǵy halyqaralyq týrnır Qazaqstannyń Halyqaralyq at sporty federasııasy aıasyn­daǵy be­deldi jarystardy joǵary deńgeıde uıym­dastyra alatynyn taǵy bir márte kórsetti. Úsh kúnge sozylǵan báseke qo­rytyndysynda Qazaqstan qura­ma­sy 14 medal jeńip aldy. Bul nátı­je otandyq at sportynyń qarqyn­dy da­myp kele jatqanyn, otandyq sport­shylardyń halyqaralyq arena­daǵy básekege qabilettiligin aıqyn ańǵartty.

Oleg Sokolenko, Raısa Soko­lenko, Núrıla Turysbekova, Iаsmın Ibragımova, Darıa Popova, Bek­jan Baıjanuly bastaǵan shaban­dozdar­dyń tabysty óneri jan­kúıerler­diń kóńilinen shyqty. Endi olar alda­ǵy halyqaralyq jarystarda da el namysyn abyroımen qor­ǵap, joǵary nátı­jelerge qol jetkizedi degen senim mol.