«Bizdiń osylaı shet elde jattyǵý jasap, jarys ótkizip júrgenimizdiń barlyǵy elimizdegi bereke men birliktiń arqasy, Táýelsizdiktiń jemesi der edim. Jelbiretetin týyń bolmasa, shyrqatatyn ánuranyń bolmasa bizge bokstasýdyń ne keregi bar? Sol úshin eldiń, jerdiń amandyǵy ol birinshi orynda. Elbasymyzdyń qanshama sport arenalaryn salyp, elimizde de erkin jattyǵýymyzǵa, jarystar ótkizýimizge múmkindik jasap berdi. Qazir ár qalada úlken sport keshenderi men baıraqty básekeler ótkizetin arenalar bar. Sportshyǵa budan asqan qandaı qoldaý kerek?
Mine, 9 qyrkúıekte EKSPO-2017 halyqaralyq kórmesi aıasynda elimizde taǵy bir kásipqoı boks keshi ótpek. Bul joly da arena jankúıerlerge toly bolatynyna senemin. Astanada ótetin jekpe-jektiń men úshin jaýapkershiligi óte joǵary. Jaqsylap daıyndalyp, qazaq eline taǵy bir jeńis syılaımyn dep oılaımyn. Qyrkúıekke deıin mamyr aıynyń sońynda AQSh-ta taǵy bir jekpe-jek josparlanyp tur. Sol judyryqtasýdan soń, Astanada ótetin boks keshindegi qarsylasym anyqtalyp, sarapqa salynatyn belbeýdi estip qalarsyzdar. Bizge túrli usynystar túsýde. Qazir meniń komandam qyzý jumys istep jatyr. Kórme kezinde Astanaǵa álemniń túkpir-túkpirinen júzmyńdaǵan týrıster keledi. Sol týrısterge qazaq eliniń boksshylarynyń deńgeıin kórsetip, álem aldynda mártebeli ekenin taǵy bir dáleldeý bizge mindet!», — deıdi Qanat Islam.
Aıta keteıik, Qanat Islam kásipqoı bokstaǵy óziniń sońǵy jekpe-jegin 18 aqpan kúni AQSh-ta brazılııalyq Robson Assısti birinshi raýndta nokaýtqa túsirgen bolatyn.