Batys Qazaqstan oblysynda qoǵamdyq kólik pen mektep avtobýsy qatysqan jol apatynan 24 bala oblystyq kópsalaly balalar aýrýhanasyna jetkizildi, dep habarlaıdy Egemen.kz.
Úsh bala travmatologııa bólimine jatqyzyldy, olarǵa jabyq bas mı jaraqaty men kontýzııa dıagnozy qoıyldy. Qalǵan 21 bala jeńil jaraqattarmen ambýlatorııalyq em alyp jatyr.
«Barlyq balalardy dárigerle qarap shyqty. Qajetti dıagnostıkalyq tekserýler júrgizildi. Balalardyń jasy 7-den 12-ge deıin», dedi aýrýhananyń hırýrgııalyq qyzmetiniń jetekshisi Daýren Kýsmaganbetov.
Jaraqat alǵan 20 bala Podstepnoe aýylynyń №2 mektep oqýshylary. Qalǵan tórt bala marshrýttyq avtobýs jolaýshylary bolǵan.
«Mektep avtobýsy baǵdarshamda turǵan kezde artynan №12 marshrýttyq avtobýs soqtyǵysty. Mektep avtobýsynda 20 bala otyrdy, olardyń janynda kezekshi muǵalim boldy. Mektep avtobýsy tarapynan quqyqbuzýshylyq bolǵan joq. Barlyq balalar travmatologııalyq pýnktke jetkizildi, ata-analary shaqyryldy. Barlyq balalarǵa medısınalyq kómek kórsetildi», dedi mektep dırektory Jadyra Týrsynova.
Aıta keteıik, apat búgin Terekti aýdanynyń Podstepnoe aýyly mańynda boldy. Marshrýttyq avtobýs júrgizýshisi ýaqytsha ustaý ızolıatoryna jetkizildi.