Boks jaıly aqparat taratatyn Boxing News jýrnaly orta salmaqtaǵy WBA (Super), IBO, WBC jáne IBF nusqalary boıynsha álem chempıony Gennadıı Golovkınniń (36-0, 33 KO) WBA (Regular) belbeýiniń ıegeri amerıkalyq Denıel Djeıkobsqa qarsy jekpe-jeginiń aldynda eń úzdik bes jekpe-jegin jarııalady. Bul týraly vesti.kz habarlady.
5. Gennadıı Golovkın – Denıel Gıl, TKO 3
Bul aıqas 2014 jyldyń 26 shildesinde Nıý-Iorktegi Madison Square Garden arenasynda ótti. Jekpe-jek bastala salysymen otandasymyz qarsylasyn qyspaqqa aldy. Alǵashqy raýndta-aq avstralııalyq boksshynyń jer taıanyp qalǵan kezi boldy. Ekinshi raýnd ta dál osy baǵytta órbidi, Denıel Gıl nokdaýnǵa tústi. Úshinshi raýnda Golovkınniń kezekti soqqysynan keıin taǵy da nokdaýn aldy. Ornynan turǵanmen, jekpe-jekti jalǵastyrýdan bas tartty.
4. Gennadıı Golovkın — Mettıý Maklın, KO 3
Qos boksshynyń arasyndaǵy kezdesý 2013 jyly 29 maýsymda ótti. WBA chempıondyǵyna úmitker bolǵan Mettıý Maklın de úshinshi raýndta jeńildi. Baýyryna tıgen soqqydan brıtan boksshysy aýyr nokaýtqa tústi.
3. Gennadıı Golovkın – Martın Mıýrreı, TKO 11
2015 jyldyń 21 aqpanynda ótken jekpe-jekte Martın Mıýrreı 11-raýndqa deıin shydas berdi. Tórtinshi raýndta brıtan boksshysy eki márte nokdaýn aldy.
2. Gennadıı Golovkın — Kell Brýk, TKO 5
Kell Brýk qazaqstandyq boksshyǵa deıin 36 kezdesý ótkizip, bir de bir ret jeńilip kórmegen. Alaıda, kezdesýdiń besinshi raýndynda brıtan boksshysynyń jattyqtyrýshysy sharshy alańǵa oramalyn tastap, jeńilgenin moıyndady.
1. Gennadıı Golovkın — Davıd Leme, TKO 8
2015 jyldyń 17 qazanynda ótken aıqas segiz raýndqa deıin sozyldy. Segizinshi raýndta Golovkınniń aıqyn basymdyǵyn baıqaǵan referı jekpe-jekti merziminen buryn toqtatty. Osy jeńisiniń arqasynda Gennadıı Golovkın IBF tıtýlyna ıe boldy.
Daıyndaǵan: Aıan ÁBDÝÁLI, "Egemen Qazaqstan"